Mumbai khawpui, Bhiwani-a nimin tuka in chimah mi 10 an thi a, mi 19 dama lak chhuah zingah naupang kum li mi pawh a tel.
Maharashtra state-a in chim hi chhawng thuma sang, mihring chenna hmun a ni.
Chhanchhuah hna thawktu, National Disaster Response Force (NDRF) chuan in chim kar atang hian naupang kum li mi pawh damin an la chhuak a. NDRF hian mi 29 an lak chhuah thu leh an zinga mi 19 chu damin an la chhuak a, mi 10 erawh an thi tih an sawi.
Patel Compound-a chhiatna thlengah hian NDRF mite thlen hmain thenawm khawvengte chuan mi 20 an lo la chhuak hman tawh bawk a. Hliam tuara lak chhuahte hi damdawi inah lak nghal an ni.
Kum 43-a upa, Jhilani Building an tih hi zing dar 3:40 vela chim a ni a. In (flat) 40 awmin mihring 150 vel an cheng.
NDRF Director SN Pradhan chuan chhanchhuah hna thawhnaah hian uisathiam rual (canine squad) pawh an hmang tih a sawi.
Chhanchhuah hna hi fire brigade leh police pawhin an thawk a. Chhiatna dang thleng palh thei ven nan power supply pawh tihtawp rih a ni.