Afghanistan-a Taliban sorkar chuan cabinet lailawk a siam chu tilianin deputy minister a ruat belh leh a. Ram tam takin an beisei angin hmeichhia a telh leh ta chuang lo va, thla tira cabinet a puanah pawh mipa hlir minister an lo ni tawh.
Ram hrang hrangte chuan Taliban hi an chet dan an thlithlai reng a. Tun hmaa ro an lo rel tawha hmeichhia leh hnam tlem zawkte an sawp ang chi kha a thlen nawn leh an phalsak tawh lo.
Kum 1996 leh 2001 inkara ro an rel lai khan hmeichhe naupang leh hmeichhiate chu sikul kal, hna thawh leh vantlang nuna inlan an phal lo bur a ni.
Taliban sorkar thupuangtu, Zabihullah Mujahid chuan cabinet an tihleh chungchangah hian Thawhlehni khan thuthar lakhawmtute a kawm a. Hmeichhia la tel lo mah se hnam tlem zawka hruaitute an tel tih an sawi a. Heng zingah hian Hazara hnam an tel tih a sawi a, hmeichhia pawh la telh belh tur an nih thu a sawi bawk.
Mujahid-a hian ram dangte chu an sorkar pawmpui ve mai tura tiin, chhuanlam tur engmah a awm lo niin a sawi.
“Kan sorkar pawm tur hian a mawhphurhna kengtu chu United Nations a ni a, ram dang thenkhat – European, Asian leh Islamic ramte nen pawh inpalai tawn kan ni,” a ti.
Mujahid-a chuan chanvo ruat thar dang pawh an la awm zel dawn tih a sawi a. Heng zingah hian minister leh deputy minister pawh an la tel dawn tih a sawi bawk.
Tun tuma deputy minister an ruat zingah hian Panjshir leh Baghlan-a chengte pawh an tel a. Panjshir bik hi Taliban dotu, National Resistance Front awmna thin a ni a, he province hi Afghanistan pum an lak mai theih lohna chhan pawh a ni.