Aizawl : Federation of Mizoram Disabled Organization (FMDO) chuan Commissioner for Persons with Disabilities thar lak tur chungchangah danin a phut ang tling chauh la turin Mizoram sorkar an ngen.
FMDO chuan, PwD Commissioner hna chu hna dang ang a ni lo va, rualbanlo te dinhmun chawikanna leh humhalhna hna thawktu a nih avangin, he lama tui mi, rualbanlo tana thahnem ngai taka thawk thei tur mi chauh la a, danin a phut angte ngai pawimawha danin a phut ang tlinte chauh la turin sorkar an ngen.
PwD Commissioner Recruitment chungchang hi politics thila inbeihna nana hman chi a ni a nih loh thu FMDO chuan tar langin, “Mizoramah hian eng party pawhin sorkarna chang se la, PwD Commissioner hi chu danin a tling a tih ngei leh rualban lote enkawlna hna missionary rilru pu chunga a tak tak a thawk thei ngei chauh hi sorkar hian la thin se tih kan duhthusam a ni,” an ti.
Rualbanlo pawl hrang hrang pakua intelkhawm FMDO tar lan danin, tuna Commissioner thawk lai hi rualbanlo te hmangaih tu leh a hna a tui em em, thahnemngai taka rualbanlo te tan a thawktu leh thiamna leh tawnhriat pawh Recruitment Rules-in a phut zawng zawng nei vek a ni a, rualbanlo te enkawlnaa kum 30 chuang zet lo thawk tawh a ni bawk. Tuna a term hi February 2024-a tawp tur chauh niin, a hmachhawp tam tak kallai te hi chhunzawm ngei se. RR in a sawi anga he hna hi term hnih chhung chelh thei a ni a. Dan ang taka midang qualify leh rualbanlo tan a tha zawk leh tawnhriat nei tha zawk an awm a nih loh chuan mi thar duh vang hrim hrimin thlaksak ngawt lo turin an ngen tih an tar lang.