Atletico Madrid in hnehna chang turin Feyenoord theihtawp a sual let an mamawh a, an tum ram erawh thleng theiin 3-2 in Dutch club lakah an chak.
Nilaini zana Cívitas Metropolitano a inkhelah hian Atletico Madrid in hnehna chang turin an goalkeeper Jan Oblak chu second half-ah a chetthat hle an mamawh a. Spanish striker Alvaro Morata pawhin a hna ngai chhunzawmin goal a khung leh bawk.
Madrid khawpui a inkhelah hian mikhual team Feyenoord an fakawm a, inkhel tan atanga a tawp thlenga an inpeknaah point khat tal hmuh an phu.
Minute 7-naah goal nei nghalin Ayase Ueda ball pet chu Oblak-a’n dang hman mahse an Atletico defender Mario Hermoso khupah a per a, Feyenoord in goal an khung.
Rojiblancos erawh an ngawi rei lo. Season bul tan tha an striker Alvaro Morata hmangin an si phurh minute nga hnuah an sut a. A goal khung tur offside avanga pawm loh ni zet mahse video assistant referee hmanga ennawn a nih leh hnuah thutlukna sut a ni.
Dutch club in minute 34-naah hma an hruai nawn leh a. David Hancko chuan Jan Oblak-a’n a chance neih hmasa dansak mahse a per atangin goal a khung.
Feyenoord hi inkhelah an langsar zawk lova, ball chang hnem zawkin chance pawh an insiam ngun zawk. Gernot Trauner hmanga huntha an bawhpelh hnuah halftime dawnah Antoine Griezman chuan Atletico si phurh a sut a. Second half tan hnu lawkah Morata chuan tun season a a goal sarihna khungin a team a chakpui.
Feyenoord tan a bikin second half-ah Igor Paixão a tal hnawk hle a, Atletico tlarhnung chhaihbuaitu berah a tang.
Goal hnih khungtu Morata chuan, “Champions League a ni a, harsa tak loh chuan a chak theih loh. Hei vang hian inkhel hautak tak hmachhawn a hnehna chan dan hi kan thiam a, a pawimawh ber chu kan beidawng ngai lo hi a ni.” a ti.
Inkhel dangah Scottish club Celtic in Lazio an mikhual a. Kyogo Furuhashi hmangin goal khung hmasa zawk mahse first half-ah Lazio tan Matias Vecino chuan a sut.
Second half tawp dawnah Lazio veteran winger Pedro chuan chakna goal a khung a. Hemi hma lawk hian Celtic in goal pawm loh an nei ve thung a ni.