Aizawl :BJP National Kisan Morcha President Raj Kumar Chahar, MP, chuan Central-ah Congress leh party dang sorkar lai chuan India hmarchhak state chu duhsak an ni ngai lo niin a sawi.
Nilaini tlai khan BJP National Kisan Morcha President Raj Kumar Chahar leh Dr. Shambhu Kumar, BJP National Kisan Morcha General Secretary te chu BJP State Office-ah Mizoram BJP hruaitute nen an inkawm a. He hunah Raj Kumar Chahar chuan Mizoramin kumin MLA inthlanpui a hmachhawn turah BJP-in thuneihna an chan theihna turin State President Vanlalhmuaka hoin hma an la dawn tih sawiin, “Kut hnathawktu te’n Mizorama harsatna hrang hrang an neih hi Delhi tlangah ka thlen ang a, Mizorama kuthnathawktute harsatna sutkian a nihna turin hma ka la dawn a ni,” a ti.
Raj Kumar Chahar chuan central-a Congress leh party dang sorkar lai chuan India hmarchhak state-te duhsak an ni ngai lo tih sawiin, “Pu Modi-a kaihhruai sorkar chuan India hmarchhak state-te atangin India hmasawnna hna chu a intan tur a ni, tia a sawi chu a taka kalpuiin, hmasawnna rotling hna thawh kawngah te, zirna leh hrisei kawngah te, agriculture leh allied sector lamah te nasa takin hma lak a ni a, hmasawnna chu a takin Pu Modi-a sorkar hnuaiah a thleng mek,” a ti.
Sorkar laipui malsawmna tak tak a taka Mizoram mipuiten an dawn theihna turin kumin MLA general election lo awm turah Mizoram hma lam hun ngaihtuah chunga BJP vote theuh turin Mizoram mipuite a ngen nghal bawk.