Bawngkawn MNF Campaign Committee huaihawta ‘Candidate lawmna leh mi thar lawm luhna’ hun hmanpuitu, MNF Adviser R Lalzirliana chuan MNF chu party hlun leh ruhkawl lian, block leh unit thlenga thawhho thatna party a nih thu a sawi.
Nimina Bawngkawn South YMA Hall-a intawhkhawmah, Mizoramin kumin MLA inthlanpui a hmachhawn tura Aizawl North I biala MNF party candidate tur, R Lalzirliana chuan mi thar lawm luh puala thu a sawiah, kalphung thar tih awmzia sawifiah si lo tlangaupuitute lam pan lova an hming leh nihnate enfiah theih mi thar eng emaw zat MNF party-a an lawm lut chu lawmawm a tih thu a sawi.
Politics chu mite tana malsawmna ni tura kalkawng a ni tih sawiin R Lalzirliana chuan, “A dawn thleng pawh a hniam tur a ni, kan dawhthleng a san a, kan chapo viau chuan miten min kalsan thin a ni. Chapo lova tlawm taka nung tur kan ni,” a ti.
Aizawl North I MNF Block President Lalrinmawia Sailo kaihhruai lawm luh inkhawmah hian Aizawl North I atana MNF official candidate R Lalzirliana hian an party-ah mi eng emaw zat a lawm lut a ni.