Aizawl district Election Officer, Bawrhsap Nazuk Kumar chuan nimin khan MLA inthlanpui neih tur chungchangah Aizawla thuthar thehdarhtute a kawm a, mode code of conduct bawhchhiatna chu khawng taka an um zui tur thu a sawi.
Kumar-i chuan inthlan puan a nih atangin MCC hman nghal a nih thu te, hei hi candidate te, political party te leh sorkar hnuaia awm zawng zawngten an zawm tur a nih thu te, MCC bawhchhiatna chu kawng takin umzui a ni dawn tih a sawi.
Election candidate-te sum hman dan ngun taka vil tur election expenditure monitoring (EEM) team hrang hrang din a ni a, heng bakah hian enforcement agency hrang hrangte pawhin hna an thawk tan dawn tih te, MLP Act chu khauh taka kenkawh a nih tur thu a sawi a. Aizawl district-ah polling station 321 a awm dawn tih te, assembly bial tinah hmeichhiain an vil pink polling station pathum theuh neih tum a nih thu te a sawi.
Aizawl DEO chuan tluang tak leh felfai taka MLA inthlanpui neih a nih theih nana theihtawp chhuaha inthlan buaipuitute tawiawm turin mipui a ngen a, inthlanna zalen, thianghlim leh mi tin huap neih a nihna turin media-te nena inrema taka thawhho zel an duh thute a sawi bawk.
Aizawl DEO-in a tarlan danin Aizawl district chhungah hian vote nei mipa 1,34,249 leh hmeichhia 1,52,558, a vaiin vote nei mi 2,86,807 an awm a, district chhunga vote tamna ber bial chu Aizawl West I bial niin voter 29,810 an awm a ni.