- Mahmuaka Chhakchhuak
America ram ropuina hi kawng tam tak sawi tur a awm. Kan tana entawn tlak an nihna hi chi hrang hrang sawi tur a awm thei bawk ang a, tuna tan erawh chuan an ram hruaitute nungchanga entawn tlak an nihna thu pakhat lek han sawi ila a tha ang e.
October 5, 2023 nia Vanglaini chanchinbu chhuakah chuan phek 8-naah hian Vote hmangin US House Speaker McCarthy paihthla tih hmangin House Speaker Kevin McCarthy paihthlak thu a rawn ziak a. Kevin McCarthy hi Jan. 26, 1965-a piang niin January 7, 2023 atanga October 3, 2023 chhunga United States House of Representatives-a Speaker niin Speaker 55-na a ni. Amah hi Republican Party mi leh sa a nih mai bakah Politician hlun tak a niin tunlai tawng takin ‘Veteran Politician’ tih ngei tur a ni. Speaker a nih hma hian Jan. 3, 2019 atanga Jan. 3, 2023 thleng khan House Minority Leader a ni a, chumi hma pawh chuan Aug. 1, 2014 atanga Jan. 3, 2019 thleng khan House Majority Leader alo ni tawh bawk. Heng nihna pawimawh tak tak a chelh hma hian House Majority Whip leh House Republican Chief Whip dinhmun pawimawh takte alo chelh tawh bawk a ni.
Chutiang taka Politician hlun chuan a dinhmun ropui tak chu vote hmanga paihthlak a han nih takah chuan India hmarchhak kil atang pawhin a chanchin chu kan lo ngaihven lo thei lo a. Mak tihna leh a awmna Party, Republican Party House member te ngei pawh chuan a thlavang an hauh lo em ni kan lo ti a. Nimahsela kan hriat theuh angin Republican Party member te ngei pawh chuan a thlavang an lo hauh lo tlat mai. Vanglainiin a ziah danah phei chuan US chanchina House Leader vote hmanga paihthlak a thlen tum khatna a ti hial a ni. Kan chhiar zel chuan paihthlak duhtu lamah vote 216 tlain paihthlak duh lo lama hian vote 210 a tla bawk a, a inthlauhna hi vote 6 chauh a ni a. Republican Party chuan majority an neihna hmun a ni nghe nghe bawkin a awmna Party atang ngei pawh chuan mi 8 chuan amah hi duh loin a duh lo lamah vote an thlak bawk a. Party feeling chu an nei lutuk lo ni awm tak a ni.
Hetiang bawka Feb. 9, 2021 nia US Politics-a thli thleng kha kan la theihnghilh hmanin a rinawm loh a, US President Donald Trump-a’n Impeachment vawi hnihna a hmachhawn a nih kha. A ni pawh kha a awmna Party (Republican) mi leh sa pasarihte chuan Democrats duh danin vote an thlak zawk a nih kha. Khang Senator pasarihte; Richard Burr, Bill Cassidy, Ben Sasse, Lisa Murkowski, Mitt Romney, Pat Toomey leh Susan Collins te khan Party feeling nei miah lo ang maiin an duhna taka vote an thlak a nih pawh a rinawm a, Party aiin ram mipuite an hmangaih zawk pawh a ni mahna le. Kan ram politician tam takte ngaihdan angin an vawn tawh chu sahuai thing vawn tum tlatna emaw kan Party alawm tih vanga a thlavang hauh tumna lian tak pawh an nei lo a nih kha.
Mi fate hi chuan ropui bikna riau hi an nei leh tlat zel thin a, kheh neuh neuh chuan uih lai chu an nei ve ngei chuan a rinawm tho nain entawn tlak tak tura thiltih an nei leh tlat si thin. Tuna House Speaker paihthlak chungchangah ngei pawh Party feeling kalpui na awm tak an nih laiin Republican Party member pariatte chuan an duh lohna chu huaisen takin an lantir a nih kha. Keini ngaihtuahnaah chuan mahni Party te chu in tan em em turah ngaih a niin, an thiltih sual leh tih dik lohnaah pawh an thlavang hauh tlat tur emaw kan ti ngei ang a, nimahsela America ramah chuan member tupawhin huaisen takin an duhna lamah vote an pein an pe lo mai zawk chu a ni si. Party atanga hnawhchhuah emaw show cause notice pek emaw a thleng tawh thin em tih erawh ka hre hauh lo nain chutiang chu lo thleng tawh thin pawh nimahsela an duhna takah chuan vote an la thlak ta tho zel chu a nih hi.
McCarthy ngei pawh hian thiltih fuh loh a nei ve reng reng ni awm tak a ni a; tun hnaiah President Joe Biden laka impeachment inquiry a kalpui danah Democrats ho a tih lungawi loh hle bakah sum leh pai lama harsatna an tawh avanga sorkar shutdown thleng thei tur danna atana spending bill siam pawh zirchianna hun a lo pe tlem bawk ni awm tak a ni. Heng zawng zawngah hian vote 6 lekin House Speaker atanga paihthlak a lo nih phah ta a, sawi tawh angin a awmna Party atang ngei pawhin mi 8-te chuan amah an duh lohna lantirin a duh lo lamah ban an phar a nih kha. House pawn lamah hian an inkawk sawk sawk ang em tih erawh hriat phak ni chiah lo mahsela mi 8-te hi kei chu an inchhir ka ring hauh lo mai.
Hnampuite hi chuan mi an sawisel fo lo a, social media hmangin an ankhum fo lem lo bawk a. An ngainat loh zawngte pawh hi an chanchin an sawi tlem mai a, a hun leh hmun takah chuan kan sawi ang hian huaisen takin an che mai thin. A hun lo tih an hriat chuan an ngawi mai a, a hun nia an hriatah thung chuan an inthlahrung hauh lo tihna a ni mai. Chutiang chuan ram an siamtha zawk a, ram leh hnam hmangaihna dik tak tur pawh a niin a lang. United States-ah chuan Politics hian Constitutional federal republic leh Presidential system framework chhungah hna a thawk a, thuneihna insemin Branch hrang hrang pathum a awm a, chungte chu: Legislative branch siamtu U.S. Congress, House of Representatives leh Senate awmna Bicameral Legislative body leh Executive branch te niin Executive bik hi United States President-in a kaihhruai a, chu chu ram chhunga ram leh sorkar hotu ber hna thawktu a ni a, Judicial branch, Supreme Court leh Lower federal court-te awmna, Judicial power hmang tute pawh a ni.
House of Representatives Speaker meuh chu a dinhmun pawh a sang hle mai a, The New York Times-in a tarlan danah chuan Speaker atanga paih tur hian Democrats member 208 leh Republican member 8-te chuan paih tha an tiin paih tha ti lo lamah hian Democrats lam atangin vote pe an awm lo a, Republican atangin mi 210 chuan paih tha ti loin vote an pe bawk a. Republican lam atanga paih tha tia vote pe tute chu: Andy Biggs, Ken Buck, Tim Burchett, Eli Crane, Matt Gaetz, Bob Good, Nancy Mace leh Matt Rosendale-te an ni a, heng mite hi kan ram hruaitute ni ta sela kan khaihlum duh ang nge Chawimawina Nopui kan hlan zawk ang le?
Aw, America……..