England cricket team in ICC Men’s Cricket World Cup 2023-ah an match hmasa bera an tlawm hnuah an tho lehnghal a. Bangladesh chu run 137 a sawpin hnehna an chang.
Thawhlehni a Dharamsala a inkhelah hian England tan batsman Dawid Malan chu a che tha a. Ball 107 atang run 140 siamin over 50 chhunga run 364 an siam theih chhan a ni.
Vuak hmasak tir England tan Malan leh opener Jonny Bairstow ten wicket hmasa bera inkawpin run 115 an siam a, run 52 siam Bairstow out hnuah Joe Root(82) nen ding dun lehin run 151 an pahnih inkawpin an siam leh.
Bangladesh tan Liton Das chuan run 76 siamin Mushfiqur Rahim chuan run 51 a siam a. Mahse England tan seamer Reece Topley chuan ball thar a vawm hmang tangkai Bangladesh top order a wicket pawimawh a la a. Over 10 vawmin maiden vawi khat a vawm bakah wicket li a la. Bangladesh hi over 48.2-ah run 227 siamin an out zo.
Thawhlehni inkhelah New Zealand in hnehna an chang nawn a, Netherlands lakah run 99 in an chak.
Kiwis tan Will Young, Tom Latham leh Rachin Ravindra ten half-century an siam theuh.