A hunlaia England a attacker hmuhnawm bik, Chelsea leh Belgium player ropui Eden Hazard chuan kum 32 mi niin professional football a chawlhsan thu a puang.
Nilaini zing khan Hazard hian kum 16 chhunga a lo khelh tawh football chu a mangtha thu a sawi a. A chawrchhuahna club Lille leh Chelsea-ah te a hlawhtling a, a tawp kharna Real Madrid-ah erawh beisei a pha ta lo.
Hazard chuan, “A hun taka chawl turin mahni ngaihtuahna thuk zawk hi ngaihthlak ve a ngai fo thin. Kum 16 chhungin match 700 chuang ka khelh hnuah professional footballer anga ka zinkawng chu ka duhtawk ta. Ka suangtuahna te a tak ramah ka chantir thei a, khawvel hmun hrang hrangah hlim takin hun ka hmang.”
“Ka inkhelh chhungin manager, coach leh teammate tha tak takte ka tawng thei hi ka vannei a, in kiangah hun ropui tak tak ka hmang a, in hnenah lawmthu ka sawiin in ngaihawm dawn hlawm hle.”
“Ka club khelh tawhnate : LOSC, Chelsea leh Real Madrid te hnenah lawmthu ka sawi a, ram tana khel tura RBFA in min thlang thin pawh ka lawm.”
“Ka chhungte, thiante, ka kianga min puitute zawng zawng chungah lawmthu ka sawi a. A tawp berah chuan min tantute zawng zawng hnenah lawmthu ka sawi a ni.” tiin a thutlukna a sawi.
Footballer hmuhnawm bik Hazard
Hazard hian Lille youth team atangin kum 2007 khan kum 16 mi niin football zinkawng a tan a, French club tan match 149 khelin goal 50 a khung a, Ligue 1 leh French Cup te chu kum 2011 khan a lakpui.
Kum 2012-ah Chelsea in Pound maktaduai 32 in an lalut a, club player ropui ber zing ami ni turin a invawrh.Blues tan vawi 352 khelin goal 110 a khung a. Premier League chanchin a season khat a goal 15 leh assist 15 nei tling thei pali zing ami chauh niin kum 2018-19 season khan goal 16 leh assist vawi 15 a nei a. Thierry Henry, Matt Le Tissier leh Eric Cantona te hnung a zui.
Kum 2019 khan Pound maktaduai 89 in Real Madrid a zawm a, beisei sang tak nei mahsela beisei a pha lova, hliamin a tlakbuak bawk avangin Blancos tan vawi 76 chiah a inkhel thei a ni.
Belgium tan erawh player ropui a ni a, vawi 126 an ram tan hian inkhelin goal 33 a khung a. World Cup vawi thum leh European Championship vawi hnih khelin match 56 captain a ni a, 2018 World Cup a pathumna an nih theih chhan a ni.
Trophy lak tawhte:
Lille
Ligue 1: 2010–11
Coupe de France: 2010–11
Chelsea
Premier League: 2014–15, 2016–17
FA Cup: 2017–18
Football League Cup/EFL Cup: 2014–15
UEFA Europa League: 2012–13, 2018–19
Real Madrid
La Liga: 2019–20, 2021–22
Copa del Rey: 2022–23
Supercopa de España: 2021–22
UEFA Champions League: 2021–22
UEFA Super Cup: 2022
FIFA Club World Cup: 2022
Mimal chawimawina dawn thenkhatte :
UEFA Europa League Player of the Season: 2018–19
Ligue 1 Player of the Year: 2010–11, 2011–12
FWA Footballer of the Year: 2014–15
Premier League Player of the Season: 2014–15
PFA Players’ Player of the Year 2014–15
PFA Fans’ Player of the Year: 2018–19
Belgium Player of the Year: 2017, 2018, 2019
Ligue 1 Young Player of the Year: 2008–09, 2009–10
PFA Young Player of the Year: 2013–14
Ligue 1 Team of the Year: 2009–10, 2010–11, 2011–12
FIFA FIFPRO Men’s World 11: 2018, 2019
PFA Premier League Team of the Year: 2012–13, 2013–14, 2014–15, 2016–17
UEFA Team of the Year: 2017, 2018
UEFA Europa League Squad of the Season: 2018–19