Pakistan ram nuclear bomb-te pa’ tia an sawi mai thin, Dr Abdul Qadeer Khan chu Covid-19 a kai avanga damdawi ina enkawl reng a nih hnuah kum 85 mi niin a thi.
Dr Khan-a hi Islamic ram zinga nuclear power nei hmasa ber ram ni tura chhuahin an ramah chuan an pasaltha a ni.
Hetih rual hian a nuclear thuruk hi ram dang thenkhat, North Korea leh Iran hnenah pawh a rawlruk nia sawi a ni bawk.
Prime Minister Imran Khan chuan ‘national icon’ an chân thu a sawi.
“Kan ram hi nuclear ralthuam nei rama min siamna avangin kan hmangaih tak zet a ni,” tiin prime minister hian Twitter-ah a tar lang.
AQ Khan tia an sawi mai thin scientist hi Pakistan-in Islamabad bul, Kahuta-a nuclear plant hmasa ber a dinnaa a sulsutu a ni a. Kum 1998 khan an nuclear ralthuam hmasa ber an enchhin zui.
A hma lawkin India-in a enchhin a, Dr Khan-a kaihhruaina hnuaia an siam chhuah an enchhin veleh chuan Pakistan chu khawvela nuclear chakna hmang ralthuam nei pasarihnaah dahin ram pumin an lawm a ni.
Kum 2004 khan nuclear technology hi Iran, Libya leh North Korea hnenah a rawlruk nia puhin man a ni thung a. Ram dang hnena nuclear thuruk a lo pe chhawng tih a than hian an ram pum a barakhaih nghe nghe.
Television-a thu a sawiah Dr Khan chuan pawi a tih thu leh ngaihdam rual loh thil a tih thu a sawi nghe nghe a; mahse, hetih laia an president, Pervez Musharraf chuan a ngaidam a, pawn chhuak thei lovin kum 2009 atang khan hren a ni thung.
A chunga an ram sorkar tih dan hi khawthlang ramte chuan an duh lo hle a, khawvela nuclear lama pa ropui a nihna chu zahsak turin an ti.
Hren ni mah se Pakistan-ah hian an ram himna atana a thawh hlawk em avang hian zah kai leh an chhuan a ni reng bawk.
“Nuclear chakna hmang ralthuam min pe a, a thawn leh ram tana a thil pek hi theihnghilh a ni tawh lo vang,” tiin President Arif Alvi chuan a sawi.