Lungalhthei tlakchham avangin ni hnih khat hnuah chuan state thenkhat chu an buai dawn nia sawi a awm mek a. Hetih lai hian sorkar laipui chuan manganna tur a awm lo niin a sawi ve thung.
Lungalhthei hi khawvel pumah a man a san avangin India pawhin a nei tlem mek nia sawi a ni a. A tuar thei zingah Delhi pawh a tel.
Gujarat, Punjab, Rajasthan, Delhi leh Tamil Nadu te chuan lungalhthei hmanga siam power an chatlak phah thei dawn nia sawi a ni.
Delhi Chief Minister Arvind Kejriwal chuan Prime Minister Narendra Modi hnenah lehkha thawnin power plant-te hnena lungalhthei pek a pun loh chuan ni hnihah an buai dawn tih a hrilh.
Punjab-ah pawh thermal power plant-ah an indaih loh tan avangin power inneih chhawk an kalpuina hmun a awm nual a. Punjab State Power Corporation Limited chuan ni nga daih vel lungalhthei hi an la kawl niin an sawi tih news agency Press Trust of India chuan a tar lang.
Hetih lai hian Union Power Minister RK Singh chuan chiaina tur a awm loh thu a sawi thung a, “Hetiang hi tul lo taka chiaina a ni a, GAIL leh Tata nena inbiakpawh fuh loh vang mai mai chauh a ni,” a ti.