Myanmar hmarchhak, Chinese ramri bulah an ram buai tlanchhiatsantute awm khawmna camp hmun laipuia kahnaah naupang telin mi 29 vel an thi.
Camp hi an rama sipai roreltute dotu pawl, Kachin Independence Organisation (KIO)-ten an awp lai hmuna awm a ni.
Thite hi an vaiin civil mi an ni tih KIO thupuangtu chuan BBC a hrilh.
Kum tam tak chhung buaina awm tawhna, Kachin State-a inbeihnaa thi an tam ber tum zinga mi a ni.
Kachin thuneitute chuan KIO hian sipai sorkar beitu hel pawl dangte an thlawp nasat avangin kum liam ta chhungin sipai sorkar hian anmahni an bei nasa zual niin an sawi.
Myanmar-ah hian kum 2021-a sipaiten mipui sorkar paih thlaa thuneihna an chan thar leh hnuah buaina a nasa zual a. Sipaite hian anmahni dotute hi an bei na sawt a, thlawhna hmang pawhin a kap nasa hle.
Mipui sorkar, National Unity Government (NUG) chuan camp beitute hi sipai nia chhalin, ‘indonaa pawikhawihna leh mihring dikna chanvo palzutna lian tak’ a nih thu a sawi.
Sipai sorkar thupuangtu, Major General Zaw Min Tun chuan he beihnaah hian sipai an tel lo niin a sawi ve thung.
Heng lai hmunah hian sipaiten beihpui an thlak lo hrim hrim niin a sawi a, puak thei an chhekkhawlte a puak zawk a ni thei tih a sawi.
Tual chhung chanchinbuten thlalak an thehdarhah chuan in chim karah ruang a let pheng phung a, kawng sirah ipa ruang an dah a awm nual bawk.
Mong Lai Khet Quarter beihna hi Thawhtanni zan tlai tawh taka thleng kha niin tlangram khua, Laiza-a KIA headquarters atanga mel hnih vela hla a ni.
Zan laia thil na tak puak avang hian camp-a hmun thenkhat a chhia niin KIO thuneitute chuan BBC a hrilh.
Video darhah pawh in tam tak a chhia a, hliam pawh an awm nual tih a lang.
Kachin thuneitute chuan thi zingah hian naupang 11 vel an tel niin an sawi a. Mi 56-in hliam an tuar a, an zinga 44 hi damdawi inah enkawl zui an ni.
Myanmar-a United Nations chuan camp-a thihna thleng chu ‘pawi an ti’ tih an sawi.
“IDP camp-te hi raltlan leh civil mite hmun a ni a, eng ang mi pawh ni sela bitum tur chi an ni lo,” tiin Facebook-ah an tar lang.
Camp awmna chhehvel hi kum tam tak chhung buainain a tuam tawh a. Tual chhung mite erawh chuan tun hnaiah erawh inbeihna ang chi a thleng ngai ta lo hle niin an sawi.
Tun tuma beihna hi thlawhna atanga kah pawh a ni thei nia sawi a awm bawk.
Kum khat dawn liam taah khan Myanmar air force chuan precision guided bomb hmangin Kachin-a open-air concert nei lai an kap a, mi 80 chuang an thi.
October thla tawpah khan Anampa, Kachin State-ah sipaiten thlawhna atanga an kahnaah mi 60 chuang an thi bawk.
KIA hnuaia ralthuam keng pawl, Kachin Independence Army (KIA) hi Myanmar-ah chuan hel pawl lian leh thiltithei ber an ni a. Kum 2021-a sipai sorkar a din thar leh hma atang tawh khan sipaite hi an lo do tawh a ni.
KIA hi kum tam tak chhung Rakhine State-a awm, Arakan Army nen an lo thawkho tawh a, Myanmar-a hel pawl dang hnena ralthuam petu nia ngaih an ni bawk.