Aizawl: MPCC Sr. Vice President Lal Thanzara’n Mizoram mipui tan sakhaw zalenna duhtu, Congress party chu Pathian rinchhanin kumin MLA inthlanpuiah an ding leh dawn niin a sawi.
Thawhtanni zana Aizawl North III Block Mahila Congress Committee bultuma Edenthar BSUP-a inkhawm buatsaihah, Aizawl North III INC official candidate ni bawk, Lal Thanzara chuan BSUP-ten tui lama harsatna an tawh chu sorkarna an chang a nih chuan an harsatna sutkiansak an nih tur thu a sawi a. “BSUP-ten MNF sorkar hnuaiah tui in tlachham tih kan hria a. Sorkarna min pek chuan in harsatna hi, ‘kan ti ang,’ kan tih chu ti mai thin Congress party hian kan rawn phuhruksak dawn che u a, kan ti hlawhchham lo ang che u,” a ti.
Lal Thanzara chuan kum 2023 MLA General Election lo awm turah an elpui party dangte chuan an hmangaih thar thut dawn a, an hmangaihna tak tak a nih leh nih loh finfiah hmasa turin a chah bawk.
MNF party-in an intiamna pakhatmah an tihlawhtling lo nia sawiin Lal Thanzara chuan, “MNF sorkar hnuaiah Pu Zoramthanga hova kuttling lova sum lak a tamzia te, hnam dang contractor an hausakzia te hi Mizoram mipuiin ngaihtuah chiang ang u,” tiin, MNF party chu vote nachhan tur an la neih a an vote chhin chuan an tihfuh a rin loh thu a sawi.
ZPM pawhin kalphung thar zuarin, enchhin turin an inzuar mek nia sawiin Lal Thanzara chuan, “Chief minister-a an tawktarh pawh Pu Lalduhoma a ni. A party din ngei pawh chhuahsan duhtu hi kan enchhin a ngaihna a awm lo a. Mizoram miputen enchhin hi kan ba lo va, a thusawi tam tak leh amah a dik tawk lohzia hi enchhin ngai lovin a lang sa tawh a ni,” a ti.
Lal Thanzara chuan Kristian tana him lo sakhaw zalenna ngai pawimawh lotu BJP leh a thawhpui MNF-te hnawl an ngai tih a sawi a. “Nakin lawka BJP thawhpui tumtu ZPM pawh hi Mizo Kristiante hian kan hnawl a ngai a ni,” a ti bawk.
He hun hi Laldinpuii, President Aizawl N III BMCC-in a kaihruai a ni.