Sevilla chuan an head coach Jose Luis Mendilibar chu tun La Liga season tharah an match hmasa pariat atanga vawi hnih chiah hnehna an chan hnuah an ban.
Kum 62 mi Basque manager hian tun season liamta khan talbuai nasa tak Sevilla hi season tawp lamah a enkawl a. La Liga-ah inhamtanpui thei.
March thla khan Jorge Sampaoli thlaktu tur atan lakluh a ni a. Relegation zone atang a team hi a himpui thei a. An club chanchin a vawi sarihna atan Europa League title a lakpui bawk a, hei vang hian tun season-ah UEFA Champions League an khel.
Sevilla hian October 21 hian La Liga-ah Real Madrid an mikhual dawn a, hemi hnuah hian UEFA Champions League-ah Arsenal an hmachhawn leh ang.
Hei vang hian club tam takten an tih thin tawh angin ram tana inkhel tura player te an kal darh lai club fixture awl a zau laiin Sevilla in remchang an la.
Andalusia club hi La Liga-ah 14-na an ni mek a, an inkhel hnuhnung berah 2-2 in an mualah mikhual Rayo Vallecano nen an inhnehtawk.
“Sevilla chuan tun seasona kan bul tan dan thlirin kan result te avangin Jose Luis Mendilibar chu a hna atangin chawlhtir turin thutlukna a siam.”
“Kan Basque coach chungah hian a inpeknaah hlawmthu kan asawi duh a. He club chanchinah hian Budapest a Europa League min lakpuitu a nih chu theihnghilh a ni leh tawh ngai lovang.
Season liamta khan Sevilla hian Europa League final an luhna kawngah anni aia rinkai zawk Manchester United leh Juventus te an hneh a. Final-ah AS Roma nen inkhelin hun pangngai hnehna chang thei lovin penalty hmangin an chak ta zawk a ni.
UEFA Champions League lamah RC Lens leh PSV Eindhoven te nen inkhel tawhin draw result ve ve an nei a, Group B-ah point khatin Arsenal an la pha lo mek.
Hetihlai hian amah thlaktu tur inrinsiakna thawm a ri chhunzawm nghal a, club lam pawhin manager nghet ni tur lakluh ngei an duh. Sawizawm zing ami an coach hlui Marcelino Garcia Toral chuan a club hluiah kir a tum lo niin a sawi.