Mizoramin MLA inthlanpui a hmachhawn turah ZPM-in Tuichawng biala an party candidate tur an ruat fel ta a. Heti hian he biala party lian pathum ZPM, MNF leh INC candidate tur a hriat kim tawha ngaih a ni.
July 17, 2023-a ZPM Nomination Committee thukhawmin Mizoram state assembly inthlanpui lo awm tura bial 40 awmah bial 39-a an party official candidate tur an ruat fel a, Tuichawng bialah chiah candidate nei loin an dah awl a. Nimin khan he biala ding tur turin ZPM chuan Shanti Jiban Chakma an ruat fel ta a ni.
Tuichawng biala ZPM party candidate tur hi Chakma Autonomous District Council (CADC)-ah CEM hlui a nih bakah Chakma District BJP President pawh lo ni tawh a ni a. Tunah hian Chakma District Council-a ZPM president ni lai mek a ni.
Heti hian Tuichawng bialah party lian pathum – ZPM, MNF leh INC candidate turte a hriat kim tawha ngaih a ni. ZPM candidate Shanti Jiban Chakma, MNF candidate Rashik Mohan Chakma leh INC aiawha ding tur Hara Prasad te chu Tuichawng bialah kumin MLA inthlanpuiah an inkhing dawn a ni.