Zoram People’s Movement (ZPM) thlawptu MLA pangaten nimin khan Assembly Speaker Lalrinliana Sailo hnenah bânna an theh lut.
Banna theh luttute hi Aizawl North I bialtu MLA Vanlalhlana, Aizawl North II MLA Dr. Vanlalthlana, Aizawl South II MLA Lalchhuanthanga, Aizawl West III MLA VL Zaithanzama leh Aizawl South I bialtu MLA C Lalsawivunga te an ni a. Bânna an theh luh chu speaker-in a lo pawmsak nghal a ni.
MLA pangate hian danin a phut angin MLA atanga bânna hi theh lut an ni a. Kum 2018 MLA General Election dawna ZPM-in Election Commission of India hnen atanga recognition an hmuh hman tak loh avanga ZPM thlawpin independent candidate-a dingte an ni.
Heng MLA pangate hian kumin MLA General Election lo awm turah an bial ngaiah theuh ZPM party ticket-in an ding leh vek dawn a ni.
Hetih lai hian nimin vek khan thuchhuah siamin ZPM chuan October 9, 2023-a puan tak Mizoram Legislative Assembly Election result chhiar hun atana Kristiante ni pawimawh, Pathianni (December 3, 2023) ruat a ni chu tha lo an tih thu leh sawn tura an duh thu chu Chief Election Commission of India, Rajiv Kumar hnenah ziakin ZPM President Lalliansawta hmingin an thlen.