Assam-ah kumin chhunga Japanese Encephalitis (JE) natna avanga mi 142 zet an thih hnuah a vei thar an awm ta rih lo va. National Health Mission (NHM)-in report a siam tharah ni hnih liam ta chhungin kai thar hmuh an ni lo.
Hetih rual hian thuneitute erawh an la fimkhur hle a, September thla thleng hi chuan kai thar an awm thei reng tih an sawi a. Nasa taka thawktuten hma an lakna chuan rah tha a chhuah tan mek niin an sawi.
JE lêng chiam avang hian central team pawhin Assam hi June 30-July 1 chhung leh July 8-July chhung khan tlawhin a theih ang angin an pui a. “June-July hi JE lên duh hun lai tak a ni a, a nihna takah chuan August atang hi chuan tlahniam tawh tura ngaih a ni a; mahse, kuminah bik hian fur chhung hi chu inrin a ngai dawn a ni,” tiin NHM chuan an sawi.
A lên nasat lai, July thla laihawl vel kha chuan kai thar hi ni tin mi 25 atanga 35 awm ziah ang an ni a. Kar liam ta, Zirtawpni thleng khan kai thar 13 chauh an awm tawh a. Nunna chân pawh Nilainia mi 2 thi bâk an awm belh tawh lo.
January atang khan Assam-ah hian he natna kai hi mi 606 zet an awm hman a, nunna chân pawh mi 142 lai an tling hman bawk.