Aizawl: Mizoram State Assembly inthlanpui lo awm turah Lalpa Chhiahhlawh Intelkhawm chuan nimin khan Aizawl Press Club-ah candidate an neihna tur bial pali an puan belh.
Lalpa Chhiahhlawh Intelkhawm hian candidate an neihna tur bial 11 an lo puang tawh a. Nimin khan thu thar thehdarhtute hmaah an General Secretary Lalruatfeli Hlondo chuan candidate an neihna tur bial pali a puang thar leh.
Candidate tur an puante chu Aizawl North II bialah Lalrinpuii, Dampa bialah Lalramdingngheti, Tuichang bialah Agnes Vanlalhmunsiami leh Aizawl South I bialah Rothuama te an ni.
Hei bakah Rev Dr Zaichhawna Hlawndo leh Lalruatfeli Hlondo te chu bial pahnihah an chuh dawn niin an sawi bawk a. Serchhip biala ding tura puan tawh, Rev Dr Zaichhawna Hlawndo chu Hrangturzo bialah a ding kawp dawn a. Lalruatfeli Hlawndo hi Aizawl North I bakah Aizawl East I bialah a ding dawn bawk.
Heti hian Lalpa Chhiahhlawh Intelkhawm hian kumin inthlanpui lo awm turah bial 18-ah candidate an neih tur thu tihchian a ni ta a ni.
Lalruatfeli Hlawndo chuan Lalpa Chhiahhlawh Intelkhawmin bial 40-ah chuh vek an tum thu a sawi a. Tuna bial 22-a candidate an la neih lohna bialah pawh candidate hming pek luh tawp ni thleng hian an neih hman a beisei thu sawiin, “Mi 16-in bial 18 kan hauh tawh a. Pathian Lalram sorkar kan ramah a din theih nan bial dangah Lalpa chhiahhlawh an din zel theih nan tawngtainain hma kan la mek,” a ti.
November 7, 2023-a Mizoram State Assembly inthlanpui neih turah Lalpa Chhiahhlawh Intelkhawm hian ‘Zungbun’ chu an chhinchhiahna hman tur a nih thu a sawi bawk.
Lalpa Chhiahhlawh Intelkhawm candidate turte:
- Rev. Dr. Zaichhawna Hlawndo – Hrangturzo & Serchhip
- Lalruatfeli Hlawndo – Aizawl North I leh Aizawl East II
- Upa K. Lalrimawia – Lunglei North
- Upa H. Biaklawma – Aizawl South II
- T. Upa ZD. Dengngura – Lunglei South
- Phirthianga – Siaha
- K. Laldingliana – Aizawl West II
- Zonunsanga – Tuivawl
- Biakchhunga Chinzah – Lawngtlai West
- Vanlalvena – Aizawl North III
- Vanlalnghaka – Serlui
- Lalrinpuii Ralte – Aizawl North II
- Lalramdingngheti – Dampa
- Agnes Vanlalhmunsiami – Tuichang
- Sapchhawna – Tawi
- Rothuama – Aizawl South I