Aizawl: Congress Legislature Party (CLP) Leader Zodintluanga Ralte-in finance department changtu, Chief Minister Zoramthanga chu Mizoram leiba chungchangah chhutna dik lo hmanga mipui bum tum mekah puhin, “A sum enkawl thiam loh thup mawi tumin amah pawhin a dik lo tih a hriat reng a sawi thin,” a ti.
Nilainia Aizawl Press Club-a thu thar thehdarhtute kawmin Zodintluanga Ralte chuan, “Kan chief minister-in kan leibat tam luat avanga tehna dik lo hmanga mipui min bum phet a tum hian Mizo mipuite min zah lovin, tun hma anga bum mai mai theihah mipuite hi min ngai niin ka hria,” a ti a, a rilru natthlak a tih thu a sawi.
Khawvel leh India ramin leiba tam zawng tehna a nei a, chu chu state-in a thawhchhuah (GSDP) atanga chhuta leiba percentage a nih thu sawiin Zodintluanga Ralte chuan, “Reserve Bank of India data-a a chiang tawh (actual) hnuhnung berah chuan Mizoram hian kan GSDP atanga chhutin leiba 56.7% kan nei a, India rama leiba ngah ber kan ni. Data hnuhnung ber mah se, la danglam thei, 2023 (budget estimate)-ah pawh GSDP atanga kan leiba tura chhut chu 53.1% niin, India rama leiba ngah ber kan ni leh dawn tho,” tiin, state leibat dan enin actual a chhuah hunah chuan 53.1% aiin a sang ngei dawn tih a chian thu a sawi.
Zodintluanga Ralte chuan thawh chhuah ngah tak leh thawh chhuah nei tlem tak bat zat hi an pawisa bat zat atanga chhut a fuh theih loh avangin khawvel pawhin ram leh state-te leiba chhutna atan an thawh chhuah zat (GSDP) atanga an leiba neih zat percentage chu leiba neih tam zawng tehna a hmang a nih thu a sawi a, “Kum khata Rs. nuai 10 thawk chhuak thinin, Rs. 10,000 leiba a neih nge, kum khata Rs. 10,000 thawk chhuakin Rs. 10 ba se phurrit ni zawk ang?” a ti.
Leibat hrim hrim hi an sawisel hran lo va, bat a tulna chinte pawh a awm tih CLP leader hian a sawi a. Hnathawhna tura tangkai taka hman a nih phei chuan awmze nei taka ba neih hi a pawi lohna awm hran lo mah se, India rama leiba ngah ber ni chunga ram dinhmun thlir hian a lungawithlak loh tih a sawi a, “Leiba tun siin hmasawnna hmuh tur awm si lo, chief minister duhsak zawng leh a minister chuamte an mawm em em a, mipui chu sawi loh, minister thenkhatte pawh an ro hle a ni,” a ti.
CLP leader chuan ram sum leh pai virvel hi mi tlemte kutah hnianghnar takin a lut a, mipui tam ber hi chu ni tin eikhawp zawng chawpin, mangan tawpa tlukluhna damdawi in awmna bill ba pawh tlak hleithei lovin an rum thung niin a sawi bawk.
CAG report hnuhnung berah Mizoram sorkar chuan a leibat Rs. vbc. 3,797.95 (83.28%) chu a hmaa leiba a lo neih tawh rulhna atan a hmang a, a bak Rs. vbc 762.33 (17.72%) chu thil dang atana hman a nih thu chiang taka tar lan a nih thu sawiin Zodintluanga Ralte chuan, “Hei hian kan finance enkawltu, chief minister sum enkawl kawngah a hlawhchham tih chiang takin a tilang,” tiin, MNF President Zoramthanga kaihhruaina hnuaiah term khat pawh state hi a awm leh a nih chuan ram hmabak a thim dawn hle niin a sawi.
Chief minister-in leiba ngah thu leh sorkar leh tur tan a huphurh awm thu sawi siin, party dangten sorkar an châk hle tho si tih sawi a awm thin tih a sawi a, “Hei hi thu dik a ni a, sorkar leh hi châkawm loh viau mah se, CM-in a lo kihhnawk zozai thian fai tur leh ram hmabak thim taka awm mek siam tha tur hian Congress party chuan sorkar kan châk a, awmze neia sum awm ang angte hmang chung leh CM kihhnawk thian fai turin Congress kan sorkar leh ngei pawh kan ring,” a ti.