Mizoram a Muay Thai inelna lian KC TVS 19th Mizoram State Muaythai Championship 2023 chu Nilaini khan Ramhlun Boxing Hall-ah an nei tan.
Ni li awh tur championship atan hian Thawhlehni khan Muaythai Training Centre, Edenthar-ah leh Ramhlun Boxing hall-ah te inbukna hun neih niin nimin atangin inelna hi kalpui tan a ni.
He inelna a infiammi tel zawng zawng hi mi 82 an ni a, rihna huang hrang hrang ah International Federation of Muaythai Associations dan anga championship kalpui a ni ang.
He championship hawngtu John Tanpuia, MSSC Secretary chuan, “Game thangduang leh hmuhnawm bawk si, Mizote khelh chi tak mai Muaythai Championship buatsaih a ni leh hi a lawmawm a. Ram tihmingthatu ni zel thei turin Muaythai game hi lo thang zel se, championship kheltute pawhin hlawhtlina sang zawk an chan zel theih nan duhsakna ka hlan a che u.” tiin infiammite a chah.
Muay Thai inelna lian hi Zirtawpni hian neih zawh a ni ang.