United National Liberation Front (UNLF) hel pawl chuan Manipur-a naupang kumtlinglo pawngsualtu nia chhal, Thawhtannia a chenna in bul lawka kah hlum tak, Heisnam Lalboi chu anmahni thah niin an insawi.
ULFA-in thuchhuah an siamah Bishnupur district-a Thangsa Heshnam Mayai Leikai-a kumtlinglo hmeichhe naupang sawisaa pawngsualtua puh, Lalboi hi an that tih an tarlang a ni.
Nikum February 13 khan Lalboi leh mi dang pali – H.Hopping, H.Bungo, H.Bidyananda leh H.Arunkumar te chuan hmeichhe naupang hi an chenna in bul, Thanga High School atangin ru bo va. Thi nia ngaiin an kalsan hnuah a lo thi lo va, hun eng emaw chen hnuah he thil hi a rawn irh chhuak leh ta a ni.
UNLF chuan an pawl chu hmeichhe, mi rethei leh vantlanga khawsak harsate tan an awm reng dawn tih sawiin, Thanga khaw mite chu he pawngsualna thleng chungchang chhui tur din tura nawrtu tur, joint action committee din turin an ngen nghal bawk.