India ram a Under-14 inelna 62th Subroto Cup International Football Tournament 2023 final-ah Mizoram an chak zo lova, 1-0 in Punjab aiawh lakah an tlawm.
Bangalore a Thawhlehni final inkhelah hian Mizoram aiawh a kal Chawngfianga Middle School, Saidan, Kolasib leh Minerva Academy, Punjab te an inkhel.
Final inkhel inhnehtawk takah team pahnihten goal an khung thei mai lova. Hun pangngai a goal a luh loh hnuah stoppage time-ah Minerva Punjab in freekick an hmu a, goal-ah chantirin chakna goal an khung.
Mizoram team hi Sports & Youth Services Department enkawl Saidan Football Academy zirlaite vek an ni a. Lalthawmmawia Coach leh Rozamliana Manager ten an hruai.
Subroto Cup Under 14-ah hian school 21 an tel a. Pool hnih a then niin knockout system in an khel.
Pool phase-ah Delhi aiawh 13-0 in an sawp a, quarter-final ah West Bengal 5-0 lakah chak lehin semi-final ah Meghalaya 1-0 in an hneh leh bawk.
Mizoram manager Rozamliana chuan, “Kan tumpuite kha academy tha an ni a, India ram a naupang football a tha te lakhawm a enkawlna an ni. A khelhah kan hneh zawk a, goal chance kan ngah zawk a, huntawp dawn hun pek belhah goal an khung a, an vannei ta a ni.” tiin chak zo lo mahse an inkhel a tha tih a sawi.
Mizoram team hi vawiin hian Aizawl panin an lo haw ang.
Player-te:
- Lalmuanpuia Colney
- C. Vanlalchhanhima
- R. Vanlaltanpuia
- Zoremsanga
- Vanlalmuana
- Malsawmtluanga
- Lalhnehzova
- Isak Lalmalsawma
- Lalruatdika
- Lawmsangzuala
- Lalrempuia
- Malsawmkima
- Vanlalchhanhima
- Lalvohbika
Coach: Lalthawmmawia SYS
Manager: Rozamliana SYS