Mizoram chhim lam khawthlang khawpui ber pakhat Tlabung kawng chhia chu tunlai titi ber pakhat a tling leh ta. Tlabung kawng hi Lunglei khawpui atanga 92 km chauh a ni a. Mahse, kumin fur tantir atanga kal hleih theih loha a chhiatna chu zual zelin tunah phei chuan eng motor mah an tlan tawh lo ni hiala sawi a ni a. Hetiang khawpa kawngchhia buaina an tawh avang hian kohhran presbytery te pawh an thulh hial a. Dam lo damdawiin mamawh ngawih ngawih pawh damdawiin awmna khua pan turin lawngin an inthiar hial tawh a ni.
August thlaa mizoram assembly session ah Tlabung kawng chungchang hi sawi chhuah niin PWD changtu chief minister Pu Zoramthanga chuan, kawng hi siam lai mek anih vanga heng harsatna hi thleng ani a ti a. Tlabung kawng laih hnathawktute chu NHIDCL an ni tiin hna pawh a theih anga chaka an thawh mek reng thu a sawi a ni.
Mizoram chief minister thusawi hi thudik chu ani ngei a. Amaherawhchu engatinge kawng siam anih dawn lai hian harsatna mipuiin an tawh theih thilte chu an ngaihtuah lawk loh le. Kawng laih chuan harsatna chu a awm ve ngei tur chu a ni. Amaherawh chu mipui tawrhna thleng thei tur engkim enfiah hmasak thin a ni a. A piah lamah mipui tam tak an awm tih hre reng chunga kawng kal theih loha siam hian mipui an ngaihpawimawh lohzia an entir a. Damdawi, eitur leh mamawh chitin reng thleng thei lova siam hi chu a rapthlak lutuk ta deuh a ni.
Kawng hi mihringte tana siam a ni a. Mahse, mihring ber ngaipawimawh hauh lova tih pin hi chu tih dan ani ngai lovang. A mihringte aiin helai rama Bangladesh ramri sumdawnna an ngaipawimawh zawk tihna em ni ang. August thlaah pawh a chhiat nasat tawh thu assembly house meuha sawichhuah tawh chu tunah an tawrh vanglai a thleng hi a in ngaihpawimawh loh thlak ta lutuk a ni.
Hna hi thawh loh theih ani lova. Amaherawhchu kawng hmangtute dinhmun hre renga, an mamawh lakna te tiping lova hna thawh tur anih laia hetianga mipui an tawrh tir hi court a thubuai lut hial awm a ni a. Human rights hial an bawhchhia tih hi hria se, hetiang anih avang hian rang takin kan sawrkar thuneitu, a contractor ruaitu hian mipui thinrimin buaina an siam hma ngei hian tlan theihin an siam tur a ni. Inthlan boruak te ani chho dawn a. Kawngchhiat avanga boruak ti sang thei thil tam tak a awm tih hi hre reng bawk rawh se.