Aizawl: Assembly speaker a nihna atanga bâng ta, Lalrinliana Sailo chu nimin tlai khan BJP party-ah lawm luh a ni.
BJP pisa Mipui Rûn-a lawm luh inkhawmah BJP a zawm chhan sawiin Lalrinliana Sailo chuan, “Zawhna a tam a. Mahni lam ka inngaihtuah lo a. Ram hmangaihna avanga ‘ram tan’ tia BJP zawm ka ni a. Ka rilru a nghet,” a ti.
15th Finance Commission enin Mizoram sum leh pai dinhmun a tha lo tih a sawiin, “Nakkumah pawh sum dinhmun hi a tlahniam dawn a. Engtin nge kan kal dawn tih pawh a hriat loh a. NDA hi kum 20 vel an la sorkar ka ring a, min awp dawn tho tho a. Chuvangin, Zoram hma thlir ngaihtuahin BJP ka zawm a ni,” a ti a. BJP a zawm chu central-ah pawh a nghawr nghing dawt nia an hrilh thu a sawi.
Lalrinliana Sailo chuan BJP chu ‘vai pawl’ tiin an intensiak a. Mahse, Mizoramin hmasawnna hna thawk turin BJP a mamawh tih a sawi a. India hmarchhak state zawng zawngah BJP sorkarna lo a awm lo tih sawiin, BJP sorkarna state-ah chuan hmasawnna a zuanin a zuang a. Mizoramin hmasawnna hna thawk tur chuan BJP a mamawh tih chu mi thiamte ngaihdan a nih thu a sawi.
BJP-ah mi thar a ni a, party manifesto a la hre lo tih sawiin, “Kumin MLA inthlanpui lo awm turah BJP chu party malin a sorkar dawn lo tih hi kan pawm ngam a ngai. Chutih rualin, sorkarna siamtu zingah BJP a tel ve dawn. MLA panga atanga pariat vel kan nei ang. Hetah hian central lama kan hotute nen kan thawkho ang a, Mizoramah hmasawnna a thleng dawn,” a ti.
Tun hnaia national level meeting a kalna zawng zawngah state hrang hranga Congress party hruaitute chu Congress chakna tur state a zawhin chakna tur a awm loh thua an chhan thin thu a sawi a, “Anmahni ngeiin a ngaihna awm lo an ti a. I.N.D.I.A. pawh an hming a mawi a, an state-ah an haw ang a, a zo a ni mai,” tiin, NDA sorkar chu kum 20 la awm turah an la chak dawn niin a sawi.
Hetih lai hian MLA inthlanpui lo awm turah Lalrinliana Sailo hi Mamit bialah BJP ticket-a ding tura sawi rik a ni.