India in ICC Men’s Cricket World Cup-ah an match hnihnaah hnehna chang turin harsatna lian an tawk lova, rinkai zawk an nihna sa inkhelah hnehsawh takin Afghanistan an hneh a, wicket 8 in an chak.
Delhi a Arun Jaitley Stadium-ah India tan captain Rohit Sharma a langsar a. A century siam hmangin India in over 35 chhung lekin an target an umphak.
- Record breaker Rohit
Chak turin India in run 273 siam an mamawh a. Sharma hian ball 84 lek atangin run 131 a siam.
Kum 2019 World Cup a run siam hnem ber hian Afghanistan bowler-te a vaw hneh hle. World Cup bikah century a siam vawi sarihna niin India legend Sachin Tendulkar-a record siam a khum chiah.
Hei chauh hi ni lovin century siam turin ball 63 bak a mamawh lova, hei hi World Cup-ah Indian batsman zinga century siam rang ber a ni a, kum 1983 a Kapil Dev-a’n ball 72 lek atanga a siam chu a khum.
Hei bakah hian six runs vawi nga a vuak zinga vawi thumna chu international cricket a vawi 554 a vuakna a ni a, West Indies player ropui Chris Gayle-a record siam a khum leh bawk.
India tan Ishan Kishan nen opening partnership siamin run 100 an siamin Kishan hian run 16 bak a la siam hman lo!
Run 47 a siamin Kishan a wicket a tla a, Virat Kohli lutin ani hian Sharma a thlawp chhunzawm nghal.
Australia laka run 85 siamtu hian run 55 siam lehin run 25 siamtu Shreyas Iyer nen India tan a tawp an khar a ni.
India captain chuan, “World Cup a century siam hi thil danglam bik tak a ni ziah. Mahse record lam ka ngaihtuah duh rih lo. Hmabak a la thui a, kan tum kan hlen hma a thil dang thlir ka duh lo.”
“Bul tan that a pawimawh a, tunah kan chak tluan chhunzawm zel hi a ngai.” tiin a sawi.
India hian match hnih atangin vawi hnih hnehna changin New Zealand leh Pakistan te hnung an zui a. Naktuk hian Ahmedabad ah an elpui hlui Pakistan nen inkhel nghahhlelh takah an inhmachhawn leh ang.
Hetihlai hian Afghanistan hian an match hnihnaah hma sawn mahse an tlawm vawi hnihna a ni a. Pathianni hian England an hmachhawn leh dawn.
An captain Hashmatullah Shahidi chuan, “India batting a that avangin kan pitch awmdan avangin 300 tal tlin kan inbeisei a, mahse a zawna wicket kan hloh a pawi ta a ni.” tiin a sawi.
- Match Summary
Afghanistan 272/8(50 Overs)
Hashmatullah Shahidi 80 (88)
Azmatullah Omarzai 62 (69)
Hardik Pandya 2/43 (7)
Jasprit Bumrah 4/39 (10)
India 273/2(35 Overs)
Rohit Sharma 131 (84)
Virat Kohli 55* (56)
Naveen-ul-Haq 0/31 (5)
Rashid Khan 2/57 (8)