Chelsea chuan January a player lakluh tuma an ngaihven tur zingah Napoli striker Victor Osimhen chu an telh.
Blues hian centre-forward thar an ngaihven mek a. Brentford atangin English striker Ivan Toney nen pawh sawizawm an ni a, Toney hi Arsenal pawhin an ngaihven mek.
Osimhen hian season hmasa khan Napoli tan league game 32 atangin goal 26 a khung a, Euroepean football a striker ngaihven hlawh ber zingah invawrhin kum 1990 hnua Napoli in an Serie A title hmasa ber an chawi theihna chhan lian tak a ni.
Nigeria striker hian tun season-ah a chetthat chhunzawmin match 10 atangin goal ruk a khung leh tawh. Hei vang hian lei tum tan a man a tlawm dawn lova, Napoli in Pound maktaduai 120 tal an beisei dawn nia ngaih a ni a, hei hi Toney man zat tura ngaih aiin Pound maktaduai 40 velin a sang zawk dawn niin an ngai bawk.
Chelsea hian tun nipui laia RB Leipzig atanga Pound maktaduai 52 a an lakluh Christopher Nkunku chu kumthar atangin chhawr theih tawh an beisei a, khup hliam avanga bul a la tan ve theih loh hnuah Nicolas Jackson leh Armando Broja te nen inelna a awm theih tawh an beisei. Mahse heti chung hian Todd Boehly leh Clearlake Capital hnuaia an awm chhungin player lakluh nan Pound tluklehdingawn khat chuang seng tawh mahse Osimhen hi neih belh an duh.
Hetihlai hian Napoli chuan Osimhen hi nakkum nipui thleng tal chelh ngei an tum a, kum 24 mi hi tunhnaiah club nen an inkar a tha vek lo nia a lan avangin contract thar ziahpui an tumna chu an beisei angin a la kaltluang lo.
Osimhen hian Napoli-ah hian June 2025 thleng contract a nei a, a ziah belh loh chuan Napoli tan kumthar a man tam zawka hralh chu free transfer aiin a thlanawm zawk ang.