September 4, 2023-a Dr. HTC Lalrinchhana, Special Judge, Prevention of Corruption Act, 1988, Mizoram, Aizawl-in kum li tang tur leh Rs 2,00,000 chawi tura thiam loh a chantir chu Gauhati High Court, Aizawl Bench chuan October 10, 2023 khan order tichhuakin, C. Lalfakawma hi bail-a chhuah a phalsak a. Special Judge, PC Act-in thiam loh a chantirna leh a hremna (judgement & conviction order) chu a suspend hrih bawk.
May 20, 2020 khan Mizoram sorkar hnuaia PWD department-a Deputy Secretary, H. Thanga Zate, chuan Chairperson, Mizoram Lokayukta, Aizawlah complaint a theh lut a. A lehkha theh luhah hian C. Lalfakawma, J.E. PWD chu Khawzawl PWD Division hnuaia Rabung atanga Aiduzawl PMGSY kawng laiah Contractor Lalroenga hnen atangin thamna Rs 17,00,000 lak saka puh a nih bakah, Sub-contractor Vanhmingthanga hnen atangin Rs 3,00,000 lak saka puh a ni a. He puhna hi chhui chiang turin a ngenna a ni.
Mizoram Lokayukta hian ACB hnenah chhui chiang turin a ti a, ACB-in investigation an tih zawh hnuah Special Judge, P.C. Act, 1988 Mizoram Aizawl hnenah Chargesheet an theh lut ta a ni.
June 12, 2023 atangin trial kalpui a ni a, August 28, 2023-ah sorkar ukil leh C. Lalfakawma ukil-ten final argument an neih hnuah, September 4, 2023 khan court chuan a thu tlukna puang zarin thiam loh a chantir a. A tuk, September 5, 2023 khan Special Judge Court chuan C. Lalfakawma hi kum li tang tur leh cheng nuaih hnih chawi turin hremna a chhuah leh bawk.
September 4, 2023-a Dr. HTC Lalrinchhana, Special Judge-in kum li tang tur leh Rs 2,00,000 chawi tura thiam loh a chantir chu Gauhati High Court, Aizawl Bench chuan October 10, 2023 khan order tichhuakin C. Lalfakawma hi bail-a chhuah a phalsak a. Special Judge, PC Act in thiam loh a chantirna leh a hremna chu a suspend hrih bawk a ni.