MotoGP a vawi ruk world champion ni tawh Marc Marquez chuan a team ni reng thin Honda a chhuahsan hnuah a kalna tur a chiang ta a. Gresini Racing a zawm dawn.
Kum 30 mi Spanish rider hian Japanese team hi kum 11 an thawhdun hnuah a chhuahsan tur thu a tichiang tawh a. Nakkumah Ducati satellite team tan a intlansiak dawn tih Ningani khan an sawi chiang.
Italy a inkhuar Gresini Racing chuan, “Marc Marquez hi Gresini MotoGP hmahruaitu leh hmalam a panna kawnga sulsutu a ni tawh ang.” tiin an rider thar neih tur hi an puang.
Marquez chuan, “Chona thar a ni a, ka phur tawh hle. Thil engkim inthlak danglam tur a nih avangin thutlukna awlsam a ni lo.” tiin a sawi belh bawk.
Kum 2013 khan MotoGP world champion naupang ber ni turin a kum khatnaah Marquez hi a champion a, kum 2016 atanga 2019 a zawna vawi li champion bawkin inelna a thunun.
Tunhnaiah erawh inhliam avanga harsatna tawkin beisei a pha lo fova, kuminah vawi nga chiah intlansiak a la tlan zo.
Gresini Racing-ah hian a nau Alex Marquez chu a teammate a ni ang.