Prime Minister Narendra Modi leh Russian President Vladimir Putin te chu kumin chhung ngeiin an inkawm a rinawm hle niin Moscow-a India palai chuan a sawi niin Russian news agency RIA chuan a tar lang.
“Sawiho mek zel a ni a, hotu lianten an buaipui mek a ni,” tiin India palai, Pawan Kapoor-a’n a sawi a ni.
RIA Novosti hi RIAN tih emaw, RIA tiin emaw an sawi bawk thin a, Russian sorkar hnuaia an ram chhung thil bika news agency a ni.
Indian palai hian an inbe mai thei tih a sawi bak erawh engmah kimchang a sawi lo niin RIA Novosti chuan a tar lang.
Russia-a RT News pawhin kar hmasaah khan Putin-a hian hun a hmanna hmun pakhatah India chu ‘ram thiltithei tak’ tiin a sawi niin a tar lang a. An inkungkaihna pawh tha zelin Prime Minister Modi-a sorkarna hnuaiah a tha lehzual zel niin a sawi bawk niin a tar lang.
“…India hi mihring tluklehdingawn 1.5 chuang chenna, khawvel puma eibar thannaa 7% zet thawhtu a ni a… ram thiltithei tak leh chak tak a ni a. Prime Minister Modi-a sorkar hnuaiah hian chak lehzualin a thang mek zel a ni…,” tiin President Putin-a hian a sawi niin RT News-in video a tihchhuahah a lang a ni.
Russian President hi September 9-10 chhunga New Delhi-a G20 Summit-ah khan a tel ve lo va, a aiawhin an ram foreign minister, Sergey Lavrov-a a tel thung.
Ram pahnih hruaitute hi an inkawm hnuhnung ber chu September, 2022-a Samarkand, Uzbekistan-a 22nd Shanghai Cooperation Organisation (SCO) summit neih lai khan a ni.
Samarkhand-a an inkawm tum khan Prime Minister Modi-a hian President Putin-a hnenah hian Ukraine nena an intihbuai mekna chu titawp thuai turin a ti a, “Tun lai khawvel hi indona hun a ni tawh lo tih ka hria,” tiin a sawi a ni.