Manchester United chuan an player pahnih Aaron Wan-Bissaka leh Victor Lindelof te contract pawhsei theihna an neih chu hman an tum a, mahse hetihlai hian club hotute chuan Anthony Martial a contract a pawhsei theihna awm chu an hmang dawn em tih an la inngaihtuah.
French striker hian season tawpah a contract neihlai a hmang zo dawn a, kum khat pawhsei theihna erawh a la awm. Season liamta khan inhliam avangin a inkhel tlem hle a, Premier League match 11 bak bul a tan thei lo.
Tun season-ah nipui laia lakluh thar Rasmus Hojlund thachhangdawltu atan hman niin striker rinrawl a ni tawh lo bawk a. Match 9 khel tawhin goal khat chiah a la khung.
Heti chung hian Old Trafford-ah player hlawh hnem ber zingah a tel avangin a dinhmun hi club lamin an thlir uluk.
United lam hian tun nipui khan Martial hi man pangngai taka lei tuma dawrtu an awm chuan chhuahtir an phal a, mahse amah zawkin chhuah a duh lo niin an sawi.
Hei vang hian Red Devils in Martial chungchangah hian tun season a chetthat dan thlirin thutlukna siam an tum a, season tawp thleng an nghak dawn niin a lang.