Aizawl : ZPM Working President K Sapdanga chuan MLA inthlanpui hun neih hun tur chuan ZPM party a barakhaih lo tih a sawi.
Nimina Aizawl North III huam chhung Electric Veng ZPM Information Office hawnna leh hlanna inkhawm neihah, he biala ZPM candidate tur ni bawk K Sapdanga chuan thu a sawi a. “Election Commission of India in inthlan hun atan November 7, 2023 a ruat hian party dangte a ti chi-ai a ni mai thei. Keini ZPM party chu min barakhaih lo a, hei aia hnai hi ni se kan la duh zawk. Kan inbuatsaih hma deuh avang khan nuihsawh lo hlawh tawh mah ila, kan rin phak hauh lohin remruattu fel takin rem a ruat a ni ang tih kan ring a, lawm takin kan lo pawm a ni,” a ti.
Aizawl North III ZPM Official Candidate chuan, “Aizawl North III biala kan khingpui turte hi, tuna ruling MLA ni mek, mi fel tak, nungchang tha, hawihhawm, nelawm tak a ni a, pakhat zawk hi Minister thil ti thei tak ni chunga kum 10 lai min lo enkawl tawhtu a ni bawk. Bial tana an sulhnute a chhuanawm takzet a, bial vannei tak kan ni,” a ti.
ZPM chuan corruption laka fihlim intiamin, party sorkar ni lo, kalphung thar mipui sorkar an aupui a, hmaa mite sulhnu tha chhunzawm thei turin mipuite khawngaih vote a dil tih a sawi.