Aizawl: Mizoram Secular Alliance (MSA) chuan sakhaw zalenna a awm theihna tura an thawhhonaah MNF leh ZPM-te chu thawhhopuiah sawm mah se chhanna engmah an la hmuh loh thu an sawi.
Aizawl Press Club-a nimina thu thar thehdarhtute an lawmnaah MPCC thupuangtu, John Siamkunga chuan kumin MLA inthlanpui neih tur chu Election Commission of India (ECI) vote chhiar hun atan December 3, 2023 an ruat chu, he ni hi Pathianni a nih avangin Kristian ram tan chuan pawm theih a ni lo va, sawn tura nawr mek niin, an sawi ngei an ring tih a sawi.
John Siamkunga chuan Congress party, PC leh ZNP te chuan India rama sakhaw zalenna tihchhiat meka a awm leh sakhaw zalenna paih tuma hmalak mek awma a hriat avangin, chumi do tlang tur chuan an thawkho ta tih sawiin, “MNF leh ZPM pawh thawhhopuiah kan sawm a. Mahse, vawiin thlengin an hnen atangin channa engmah kan hmu ta lo va. Thu dik lo thehdarhin tan an khawh ta em ni aw a tih theih ta hial zawk,” a ti.
MNF chu NDA member nghet tak an nih sa bakah, NEDA member ruh tak an ni bawk tih sawiin John Siamkunga chuan, “Ram pum rorelna in sang ber, parliament-ah pawh rorel lai, BJP lamah an thu a. Sakhaw zalenna humhim nana thawhpuia kan sawmna pawh min chhang ta lo a ni,” a ti.
ZPM pawh an beisei em em laiin, an bei ta hlauh zawk a tih MPCC thupuangtu chuan a sawi a. “ZPM leader phei chuan nasa takin min bei ta zawk a. BJP thawhpui loh chu an hlau hle zawk niin a ngaih theih a ni. Kan sakhua, Kristianna humhim nan chuan theihtawp an chhuah duh kan rin tehlul nen; mahse, a ni ta si lo,” tiin, tun tum inthlan tur chu sakhaw zalenna duhtu leh Hindu lalram din duhtute inbeihna a nih avangin an tan nat a ngai hle tih a sawi.
John Siamkunga hian ZPM Leader Lalduhoma’n sakhaw zalenna dan, Kristiana inlet tur danna dan (anti conversion) an pass-na state, kum 1967-ah Orissa-ah, kum 1968-ah Madhya Pradesh leh kum 1978-ah Arunachal Pradesh-ah Congress sorkar lai anga a sawi chu thu dik lo a nih thu a sawi a. Setana Bill tia sawi hi central-a Janata Party sorkar laia thleng a nih thu a sawi bawk.
BJP hian rorelna in sang berah MP a ngah a, sakhaw zalenna hi a paih thei reng dinhmunah a ding mek mah se, amah tantu state sorkar 11 chauh a la nei a, state sorkar pathum a la mamawh belh tih a sawi a. Kumin inthlanah hian neih tlin a tum a, a neih theih chuan dan hmangin sakhaw zalenna hi a paihbo tawh dawn avangin, sakhaw zalenna neih chhunzawm zel nan Congress leh a thawhpuite vote tling turin mipui a sawm.