Aizawl: MZP General Hqrs. Executive Committee nimina an President H. Lalthianghlima hova thukhawm chuan MLA inthlan lo awm tura candidate atana Mizo hmeichhia hnam dang pasal nei dah tumna awm chu dodal an rel.
MZP hruaitute thukhawm chuan Mizoram rorelna sang ber, Assembly House-a thu tur MLA inthlanna lo awm turah Mizo hmeichhia hnam dang pasal nei candidate tura dah tumna awm chu pawi a ti a, MZP-in political party tinte hnam dang pasal neite candidate-a dah lo tura vawi tam a ngen tawh chungin awmzia a nei tawk loin a hria a, Mizoram leh hnam a him zel theih nan a tawp thlengin hmalak zel an rel a ni.
MZP chuan Mizoram chhungah Mizo hming hawha hnam dang sumdawng tam tak an awm leh an huangtau chho zel chu pawi a ti a, ILP kalpui danah pawh a sponsor-tuten dan an zawm tawk lo leh hnam dang thlavang hauhtu an pung zel chu ram leh hnam tan a him loin a hria a, Mizo hming hawha hnam dang sumdawngte dapchhuah kawngah hmalak nise an ti.
Hei bakah hian Manipur buaina avanga harsatna hrang hrang pawh ngaihtuahin an harsatna tawh hrang hrangah a tul anga puih a, a bik takin zirlaite tawrhna chu a theih ang anga tanpui nise an ti bawk.