Aizawl: MNF sr. vice president, deputy chief minister ni bawk, Tawnluia’n sorkarna an chang leh a nih chuan Socio-Economic Development Programme (SEDP) chu an sem zui zel dawn tih sawiin, SEDP chu vote zawnna hmanrua a nih loh thu a sawi.
Nimin khan Mizo Hnam Rûn-ah thu thar thehdarhtute kawmin Tawnluia chuan kumin MLA inthlanpuiah MNF-in sorkarna a chang leh a nih chuan SEDP pek zui zel a ni dawn tih a sawi a, “Chhungkaw khatin nuai thum an dawn kim hma chu pek chhunzawm a ni ang a, a project azirin cheng nuai thum chuang pawh an dawng thei dawn a ni,” a ti.
Tawnluia chuan MNF sorkar chuan SEDP hmang hian kut hnathawktute leh mi harsa zawkte leirem rahtira khaichhuah hi an tum nghet tlat tih a sawi a. Family Oriented SEDP atan hian Rs. vbc 450 sen ral a ni tawh tih sawiin, “Sorkar hna vuan ve lo mipui nawlpui harsa zawkte ban phakah Mizoram budget hnuhhniam a ni hi a lawmawm a, thenkhatin sawiselin demna thu aupui viau mah se Mizoram budget, mipui hnen thleng pha a nihzia SEDP Family Oriented kalpui a ni hian a tar lang a. Hei hian mipui ban phak sorkar kan neihzia pawh a tichiang hle,” tiin, sorkar atanga thlabi hlawh nei ve lo tan SEDP chu malsawmna a nih thu a sawi.
He huna Tawnluia sawi danin SEDP 1st Phase-ah chhungkaw 60,000 hnenah Rs 50,000 theuhin pek an ni tawh a. Hemi atan hian Rs. vaibelchhe 300 sen ral a ni a. 2nd phase-ah chhungkaw 60,000 hnenah vek Rs. 25,000 theuh pek leh niin Rs. vaibelchhe 150 sen a ni a. A thawh thumnaah chhungkaw 60,000 tho target-in a dawngtu tur chhungkua thlan mek a nih laiin MLA inthlanpui puan a nih tak avangin a khaihlak ta a ni.
Tawnluia chuan, SEDP dawn mamawh ngawih ngawih, la dawng lo emaw, dawng tur thlan tawh, list-a tel lo palh emaw pawh awm theih a nih avangin hengte dawn theih tur hian kimchang leh changtlung zawka kalpui zel tum a nih thu a sawiin, sorkar thar lo piang leh turah SEDP hmanga mi rethei leh kuthnathawktute khaichhuah an nih ngei theih nan, MNF lo vote tling leh ngei turin mipui a ngen.
Zawhna chhangin MNF sr vice president chuan, “SEDP hi vote zawnna atan a ni aw-zawng lo! SEDP programme hi kan launch-na pawh a rei tawh a, hei hi scheme kal lai mek a ni. Kan sorkar hmaa kan duan thlap a ni,” a ti.
Mi thenkhatin SEDP an sem tawh dawn lo tia an sawi chungchang sawifiahin Tawnluia chuan, “SEDP sem a ni tawh dawn lo tia sawi awm avang hian, hei hi sawi rik leh a ngai a nih hi. Kan sorkar leh chuan kan programme lian tak kan chhunzawm zel dawn,” a ti bawk.
Sports association hrang hrangte hnena SEDP Rs. nuai 1 sem chungchang zawhna chu Tawnluia chuan, “SEDP hnuaiah trade an thlan tur hrang hrang a awm a. Socio economic a nih angin sports, road construction atante pawh pek a ni ang. SEDP hnuaiah zirtirtute pawh lak a ni,” a ti bawk.