Vur ram bawng tia an sawi mai thin, yak tam tak chu ei tur an tlakchham avangin tun hnaiah Sikkim-ah an thi nasa hle a. North Sikkim district-ah ringawt pawh vur a tlak nasat avanga ei tur nei lovin nikum atang khan 300 dawn an thi tawh.
North Sikkim District Magistrate Raj Yadav chuan December, 2018 atang tawh khan Mukuthang leh Yumthang huam chhungah, vur tla nasa avanga an ei tur thi nasa lutuk avangin yak hi 300 vel an thi tawh tih an chian thu a sawi.
Mukuthang bawrvelah yak thi ruang hi 250 vel chhar tawhin Yumthang-ah 50 vel an chhar tawh bawk niin Yadav chuan a sawi.
“A lan danah chuan heng yak thite hian nikum December atang tawha vur tla nasa lutuk avangin an duhkhawp ei tur an nei lo va, riltamin an thi a ni,” a ti a. Animal husbandry department-a medical team chuan a en fiah tur leh a tul anga hma la turin Mukuthang an thleng tawh tih a sawi bawk.
Team hian yak ei tur chaw an keng a, dinhmun tha lova awm mekte endik tur leh a enkawlna tur damdawi nen an thawk chhuak niin Yadav chuan a sawi.
Yadav chuan yak ruang an chharte hi Mukuthang-a chhungkaw 15 leh Yumthang-a chhungkaw 10 ta niin a sawi bawk.