Sikkim sorkar chuan tun hnaia chhiatna lian tak an tawh hnuah an huam chhunga dilte enpui turin Indian Space Research Organisation (ISRO) an sawm.
ISRO hnenah hian thlalem hmanga South Lhonak Lake leh Shako Chu Lake vilpuia tun hnaia khuarel chhiatna lian tak ang an tawh lohna tura hma lakpuiah an sawm a ni.
Sikkim Chief Secretary V.B. Pathak chuan Thawhtanni khan Union Cabinet Secretary Rajiv Gauba chu ral atanga kawmin an state-in tun hnaia chhiatna an tawh a sawipui a. Hetah hian Pathak-a chuan telecommunication-a harsatna an tawh avangin chhanchhuah leh chhawmdawl hna thawh pawh a buaithlak phah tih a sawi.
Bharat Sanchar Nigam Limited (BSNL) chuan sipaite nen ruahmanna siamin Very Small Aperture Terminal (VSAT) unit panga din an tum a, helicopter hmangin technician-te hmun pawimawh zual bik – Lachen, Lachung, Chungthang, Chatten leh Theng-ah phurh luh an tum a. Chhiatna thleng avanga inbiakpawhna mumal lo tak chu tihthat an tum dawn a ni.
Chief Secretary Pathak chuan chhiatna an tawh hrang hrang sawiin a bikin Chungthang chung, Munshithang-a Army Ammunition Depot pawh a tel thu a sawi a. Hei vang hian Teesta lui ruam hmun hrang hrangah ralthuam leh puak thei tam tak tuiin lain mipui tan pawh a hlauhawm a, then fai thuai a tul tak zet tih a thlen.
Tun tuma khuarel chhiatna ang hi an tawh lohna turin Sikkim sorkar chuan ISRO chairman bepawpin puih an ngaih dan an thlen tawh a. Thlalem hmanga South Lhonak Lake leh Shako Chu Lake chu vilpui turin an ngen a. An vilpui theih chuan dila tui awm zat te, luan liam mai hlauhthawnawmin a awm em tih te pawh an hre thei dawn a, chu chuan chhiatna thleng thei laka insasengna hun a siamsak thei dawn a ni.
Tun tum chhiatnaah khan dil tui liam leh a bula tuikhuah insah avangin tui a lian thut a, mi tam tak an thih phah a ni.