The Rock (Dwayne Johnson) chuan Israel leh Hamas indona vanga pawisawi lo nu nau leh naupangte an tuar nasa lutuk chu a rilru tinatu leh tihrehawm em emtu a nih bakah a thinrim thlak takzet a ni, a ti.
Social media kaltlangin, “Ka rilru hi a kehsawm a, ka thinrim a, Hamas firfiak pawl te’n Juda mite an ru bo a, rapthlak tak an that hian min ti na ngawih ngawih,” tiin a ziak.
Actor lar tak ni zui ta hian Middle East buaina buai chuarzia a hriat thu leh chhan leh vang dik tak hriatthiam a pawimawh thu thlenga sawiin, “Ka hriatthiam leh pawm tlat zawka chu heti anga firfiaka chetna hi sawi mawi theih emaw sawi rem theih a ni reng reng lo. Firfiaka chetna hi ka dem a, ka hnawl chiang hle a, heti ang hun harsa leh hrehawm takah hian pawisawi lo nunna chan te ka hrereng a, an chhungte leh an vui liam tak, an hmangaih em em te tana an tawrhna leh hrehawmna ka hriatpuii a, thinlung zawng zawngin ka tawrhpui. Pawisawi lo nunna tan ka tawngtai,” a ti bawk.
Hetih lai hian Justin Bieber pawhin social media kaltalng vekin Israeli leh Palestinian a thiante tana a tawrhna leh ngaihtuahzia a sawi lan rualin, tanlam (side) nei lo zawnga thu leh hla neiin, tharum thawhna nasa tak kal meka a tuartute zawng zawng a ngaihtuahthu leh an chhungte a thlawp thu a sawi.
“Israeli leh Palestinian thiante tawrhna hian min ti na ngawih ngawih. Palestinian zawng zawng hmer vek leh Israeli zawng zawng kawh kual vek hi ka tan chuan a dik thei lo. Tan lam neih a, tan lam thlan hi ka tuina a ni lo. Mahse, kan lak ata rapthlak taka an lak bo tak chhungte tana din leh an tana dilsak hi ka tuipui zawk a in,” a ti ve bawk.