Manipur-a Zo hnahthlak pawl hrang hrang inzawmkhawm, Zo United hruaituten an pawl kalphung leh nihphung (statement of purpose) an duang fel tawh niin an sawi.
Ningania Aizawl Press Club-a thu thar thehdarhtute an kawmnaah Zo United Convenor Albert L Renthlei chuan Manipur-a Zo hnahthlak hrang hrangte chu rilru hmun khat pua insuihkhawm leh tanrual a tul leh a pawimawhnate hriain tum thin mah se, an hlawhtling mai thei lo thin chu pawi a tih thu leh vanduaithlak an tih thu a sawi.
Albert L Renthlei chuan tunah chuan Central YMA kaihhruaina hnuaiah Manipur chhunga Zo hnahthlak hnam peng chi hrang hrang hruaitute chu Aizawlah vawi eng emaw zat an intawnkhawm hnuah Zo United tih hmingchawiin lungrual taka ro an rel tlan theihna tur dawhkan an nei tha ta chu lawmawm an tih thu sawiin, tunah hian Zo United chuan an pawl kal dan turte leh nihphung turte chu an duang fel tawh niin a sawi bawk.
Zo United convenor chuan kumin May 3 atang khan Meitei-te chuan tumah thliar hrang lovin Kuki Zo tiin suat mang vek tumin ralah an puang a, rawva takin an chungah an che tih an sawi.
A sawi zel danin Manipur tual chhung buaina chungchangah khaw 203-ah chenna in 8,166 leh biak in 266 halsak an ni tawh bakah kohhran pisa leh quarters 94 tihchhiatsak an ni tawh a. Mi 142-in nunna an chân tawh bakah mihring 60,000 chuangin chenna mumal nei lovin an awm mek a, tunah hian relief camp 168 awm mekin relief camp-a awm mi 41 chu natna avangin an thi tawh bawk.
Zo United hruaitute chuan Mizoram sorkar, kohhran leh tlawmngai pawl hrang hrang, chanchinbumite leh Mizoram mipui chungah lawmthu sawiin harsat, mangan, beidawn, thlabar hlauhnain a tuam mek laia hmangaihnaa lo kuangkuah an ni chu ropui an tih thu leh thinlung takin lawmthu an sawi tih an sawi.