Aizawl : Mizoram mipui zaa 60 vel hi loneih leh a kaihnawiha innghat an la nih avangin ZPM chuan kut hnathawktute hmasawnna chu ngaih pawimawh hmasak berah a nei dawn niin ZPM Leader Lalduhoma’n a sawi.
Ningania ZPM Dampa East Block Conference a hmanpuinaah Lalduhoma hian, ZPM in sorkarna an chang a nih chuan kut hnathawktute hmasawnna chu ngaih pawimawh hmasak berah an nei dawn tih sawiin, “A theih chin chinah khawl hmangin phaizawl leilet siam a ni ang a, ram awih dan a zirin terrace bakah huan leh tlangram changkham lo atan neih a ni ang a, ram awih 120% chunglam zawng chu ramngaw ah zuahin, ramsa leh nungchate chen nan leh boruak vawng daitu leh tui hna siamtu atan zuah a ni dawn a ni,” a ti.
Ran vulh lamah hma sawn theihna turin a huho leh a mi mala ran vulh duh tan ruahmanna mumal tak an siam dawn tih sawiin Lalduhoma hian, “Mi mal ran lo vulh tawh sa te pawh a tul angin tanpui an ni dawn a ni. Ranvulh tur reng reng inzirtirna leh inkaihhruaina mumal tak pek an ni ang a, mi taima hlawtlin tum tak tak chu loan hmanga scheme tha tak ruahmansak an ni dawn a ni,” tiin, chutiang zelin Sericulture te, Horticulture bakah sik leh sa leh boruak vawnhim nan ruahmanna an siam dawn niin a sawi.
Lalduhoma chuan, Mizoramin state puitling a nih hnuah pawh kawlphetha a siam chhuah zat chu a tam ber lai pawhin 26MW a nih avangin, kawlphetha lei nan hian cheng vaibelchhe tam tak a seng ral tih a sawi a. ZPM chuan kawlphetha siam chhuah belh turin project pathum, 274MW pe chhuak thei turin hma a la nghal dawn a, electric bill hi kum nga chhungin a tisang ve dawn lo niin a sawi.
ZPM leader chuan inkalpawhna kawng tha zawk nei turin hma an lak tur thu te, kum khata thawh theih tura beisei (work schedule) an siam tur thu te, contract leh supply hnate hralh chhawn kan phal ve dawn lo va, tul bika sub-contract rawih a ngaih pawhin dan ang thlapin an kalpui dawn tih a sawi bawk.
He hunah hian Dampa Constituency ZPM Official Candidate Vanlalsailova pawhin thu a sawi a ni.