Scotland in 2024 European Championship khel tura tling turin point khat bak mamawh tawh lo mahse Spain lakah an vanduai a, 2-0 in an tlawm.
Spain a Estadio Olímpico de la Cartuja a inkhelah hian Scotland in point hmuh ngei tumin an khel a. An tlarhnung khauh taka remin Spain goal nawr na tak chu a hmawr an bawk hma in an dang hman thin.
Spanish tlarhma in chance tha an hloh nual avangin first half-ah goal a lut lo. Second half-ah Scotland tan midfielder Scott McTominay chuan veilam sir atangin freekick mawi tak a khung a, mahse video assistant feree hmanga ennawn a nih hnuah goal a pawm a ni lo. He thutlukna hian sawisel a hlawh hle.
Minute 73-naah Spain tan Alvaro Morata chuan an goal hmahruai a khung a. Minute 86-naah Joselu ball cross atang Oihan Sancet chuan Spain goal hnihna a khung.
Scotland hi tlawm mahse Pathianni zana Norway in Spain laka hnehna an chan loh chuan an tling chiang tawh ang.
Spain striker Morata chuan, “Inkhel hautak takah point thum kan hmu hi lawmawm tak a ni. An goal an veng tha em em a, counter-attack atangin an hlauhawm bawk. Hetiang rilru pu a an khelh hi chuan team hlauhawm tak an ni.” tiin inkhel zawhah a sawi.
Inkhel dangah Norway in Cyprus lakah goal li an khung a, 4-0 a chakin beiseina an la insiam.
AEK Arena a inkhelah hian Norway striker Erling Haaland chuan goal hnih a khung a, ram tan vawi 27 inkhel tawhin goal 27 a khung tawh.
Croatia erawhin an mualah an mikhual Turkey an hneh lova. First half a Baris Alper Yilmaz goal khung chu sut thei lovin 1-0 in an tlawm.