Israel sipaite chuan Gaza City leh Gaza Strip hmar lama civil mi chengte chu lei lam atanga beih a tum hnaih avangin insaseng turin a hriattir.
United Nations chuan Zirtawpni khan Israel hnen atangin Gaza hmar lama cheng mi maktaduai 1.1 chuang zette chu hmun hima chhuak tura ti turin an hriattir tih a puang bawk.
Gaza-a hel leh thuneihna chang mek, Hamas-ten rin loh taka an beih thut hnua indonain ni sarih a tlin ni chiahah Israel hian thupek hi a chhuah a. Hamas laka phuba lak nan hian an châk lakna zawng zawng dangchatin Gaza Strip-a mi maktaduai 2.3 vel chengte chu chhim lam, tuipui kam hnaihah tlan khawm turin a ti a ni.
Israel hian Gaza City khawpui hnuaia leiverh chhunga cheng Hamas fighter-te beih a tum.
“Inthiar chhuah hi in himna tur a ni,” tiin Israeli sipaite chuan an sawi.
“Gaza City-a in kir leh theih hun tur chu phalna pek chhuah leh a nih hunah chauh a ni dawn a. Israel ram hnaiha venhim hna thawktute chu hnaih suh u,” an ti.
“Ni lo awm leh turah hian Gaza City-ah beihpui thlak zui tur a ni a, civil mite tihnat loh hram tum a ni,” tiin an sawi.
Inrinni kal taa Hamas-ten Israel an beih thut hnua Israeli-ten an bomb zuinaah mi 1,500 chuang, a zahve vel hmeichhia leh naupang an thi tawh a. Hamas-te chetna avang hian Israel-ah mi 1,300 chuang an thi tawh bawk.
Gaza Strip-a thuneihna chang mektu, Hamas erawh chuan Israeli sipaiten mipuite chhuak tura an tihna chu ‘an thil tum lem (fake propaganda)’ a tihsak.
Hamas Authority for Refugee Affairs chuan hmar lama chengte chu ‘in inah awm ula, rilru lama indona meka thu rintlak tawk lo, mi tihchiaina an vawrh mai mai a ni’ tih an sawi.
Gaza hmar lama UN hna thawk leh UN sikul leh hmuna cheng mi sang telte chu Inrinnia thlawhna hmanga Israel-ten chhun zan zawma an beih hnuah hmun hima inthiar sawn tura tih zingah an tel.
“United Nations tan chuan hetianga nunauten an tawrh lohna tura insaseng vek hi thil tihtheih a ni lo,” tiin an thupuangtu, Stephane Dujarric chuan a sawi.
“United Nations chuan he thupek hi a tak tak a nih chuan chhiatna nasa tak thleng mek tawh hi a aia chhe lehzuala chantirna tur pumpelh hram turin a ngen a ni,” a ti bawk.
Khawvel huap pawl hian Palestinian raltlante leh ram dang mi an hnathawkte chu Israel thupek avang hian Gaza chhim lamah a thiar chhuak tan.
“UNRWA chuan an central operations centre leh ram dang mi hna thawkte chu chhim lamah a sawn a, thawktu leh Gaza-a raltlante chu a buaipui mek zel bawk,” tiin agency hian X-ah an tar lang.
World Health Organization (WHO) chuan tual chhunga damdawi lam thuneituten damlo na tak takte darkar 24 chhunga sawn vek chu thil theih a ni lo tih an sawi tih a sawi.
“Hliam tuar na tak tak, khawl hmanga nung hram hram an awm a, chung mite tan chuan tun hi dam chhuahna remchang tlem an neih hi tihchhiatsak theih an ni lo,” tiin WHO thupuangtu, Tarik Jasarevic chuan a sawi.
“Insawn tura tih chu thi tura tihna ang a ni a, thawktute tan pawh nunrawnna piah lam a ni,” a ti.
Israeli sipaiten thupek an chhuah chiah hian Gaza-a chengte chu an chiai a, an inhnial a, an hlau hle bawk.
Gaza hmar lama awm mek, al Jazeera-a thawk, Safwat al-Kahlout chuan, “Ka pa, ka unaute leh ka thianten min rawn phone char char,” a ti a. “Engnge ruahmanna, khawiah nge kan kal ang, chhim lamah chuan khawi lai nge kan pan dawn?” tiin a sawi a, thupek chu zawm ngaihna awm lo niin a sawi.
Gaza City-a UN Palestinian refugee agency-a thawk, Inas Hamdan pawhin thil buaithlak a nih thu a sawi a. “Kan chiai a, tute tan pawh tih ber tur pawh hriat a ni lo,” tiin a sawi.
United States-ah pawh US Congresswoman Alexandria Ocasio-Cortez chuan Israel-in a nawr dan chu tul lo a tih thu a sawi.
“Darkar 24 chhunga mi maktaduai khat chuang chhuak tura intih hi thil theih a ni lo,” tiin social media-ah a tar lang.
“UN pawhin thupek hi mihring tawrhna tel lovin ‘thil theih loh’ a nih thu a sawi a. Nunna hi a pawimawh a, naupang a zahve dawn a ni bawk a, hei hi chu kalpui chi a ni lo,” a ti.
Palestinian-American comedian leh activist Amer Zahr pawhin Israel thupek chu ‘a tisual’ niin a sawi.
“Israel hian Palestinian-te hi a sipaite rûntirin firfiak takin ti turin thu a pe a ni,” tiin Al Jazeera hnenah a sawi.
Human Rights Watch hnuaia Israel & Palestine director Omar Shakir pawhin ‘ram dangte chu chhiatna rapthlak tak thleng tur veng turin’ a ngen a, Israel thupek hi mi tam tak baihvaina tur a nih thu a sawi.