Mi bum case-ah Michael Chhakchhuak chu manin, lung inah dah a ni.
SDPO Lunglei Sub Division-in thuchhuah siama an tar lan danin, Lallawmzuali, Lunglei-in Lunglei Police Station-a FIR a thehluh angin Lunglei Police Station-ah Sec 420 IPC hnuaia inbumna case ziahluh a ni a. He case-a accused Michael Chhakchhuak chu man niin nimin khan jail-ah dah luh a ni.
Thuchhuaha tar lan a nih dan chuan Michael Chhakchhuak hian bank pakhat, Aizawl New Market Branch-ah complaint thehluttu hming leh document hmangin a hnen atanga phalna la lovin loan Rs nuai 10 la a, he thil hi FIR thehluttu Lallawmzuali’n September 23, 2023-a loan dilna a thehluhah CIBIL score a hniam avanga hnawl a nih atangin hriatchhuah a ni, chhui zuinaah Michael Chhakchhuak hian February, 2021 khan loan hi la-in a lo rul lo tih hriatchhuah a ni.
An chhui zelnaah V.Laldinpuii, Lunglei, tuna Bihar-a awm hmingin loan Rs nuai 10 a lo la bawk tih hriat a ni a. Hemi chungchang chhui zui zelnaah hian Lunglei police-te chuan he case chhui zuina atana tangkai tur hriat neite chuan hriattir turin an ngen a ni.