October 16, 2023 khian zan hnih riakin Congress party hruaitu. Rahul Gandhi-a’n Mizoram a tlawh dawn niin All India Congress Committee (AICC) hruaituten nimin khan Aizawl Press Club-ah thu thar thehdarhtute hmaah an puang.
AICC thupuangtu Mathew Antony chuan ram mipuite nen inlaichinna tha zawk leh an harsatna te, an buainate ngaihthlaksaka an hrilh hriat theih nan Gandhi chuan ram chhung hmun hrang hrangah Bharat Jodo Yatra tih hming vuahin a fang kual mek tih sawiin, “Bharat Jodo Yatra-in a tum ber chu mipuite aw hupbeta ram chhung hmun hrang hranga harsatna an tawh mek, ram hruaituten an hriat phak ve loh te ngaihdan ngaihthlaksaka an tan aw pek a ni,” an ti.
Tun inthlanpui lo awm tur atan Mizoramin hma a sawn ve theih nan Mizoram pawh a tlawh ve dawn niin an sawi.
Gandhi-a Bharat Jodo Yatra hlawhtlina hi ram chhung hmun hrang hrangah hmuh chhoh mek a ni tih sawiin AICC hruaitute chuan, “State tam tak inthlan result-ah Gandhi thawhrimna leh mipui leh ram a hmangaihzia lang mek zelin, mipuiten ram a hmangaihna chu vote hmangin an chhang let ve zel a ni,” an ti.
Antony chuan Gandhi-a’n tun inthlanpui lo awm tur atan Mizoramin hma kan sawn ve theih nan Mizoram a tlawh ve dawn nia sawiin, “Mizo mipuite ngaihdan leh ram hruaituten an hriatsak ve loh an aw-te ngaihthlaksakin, Mizo mipuite nen inlaichina tha zawk leh ram hmasawnna atana thawhona tha a awm theih nan a lo kal ve dawn a ni,” an ti.
AICC hruaitute sawi danin Gandhi hian Mizoram a thlen ni hian Chanmari kawn atangin Raj Bhavan thleng kawng a dawn a. Mizoram a cham chhungin Aizawl bakah Lunglei a tlawh dawn bawk a. October 18, chawhma dar 10 hian Aijal Club-ah thu thar thehdarhtute a kawm bawk ang.
Gandhi hian India chhim tawp, Kanyakumari atanga India hmar tawp Kashmir thleng kea kalin, km 4,000 chuang kawng a zawh tawh a ni.