Aizawl: Mizo Zirlai Pawl (MZP) chuan Mizoram State Assembly inthlanpui lo awm turah political party tinte chu hnam dang pasal neite candidate a dah lo tura ngen nawnin, an ngenna ngai pawimawh lova candidate nei luite chu thlan tlin an nih lohna turin hma an la dawn tih an sawi.
Zirtawpni khan MZP Pisa Puiah MZP hruaitu tharte leh MJA-te chu an inkawm a. MZP hruaitute chuan Mizoram rorelna sang berah meuh hnam dang pasal neite thut ve hi an rem ti ngai dawn lo tih an sawi a, “Mahni hnampuite aia hnam dang neite hian ram leh hnam thil tak tak an vei phak hi MZP chuan a ring lo a ni,” an ti.
MZP chuan hnam dang kawppui nei lo tura inzirtirna a kalpui bakah Mizo hmeichhia, hnam dang pasal neite MLA candidate-a dah lo turin MLA inthlanpui apiangin party tihte hnenah ngenna an thlen tawh thin a. Kuminah pawh December 19, 2022 khan party tinte hnenah ngenna lehkha an pek vek tawh laiin, tun hnaiah candidate turin hnam dang pasal nei ngeia hriatte hming a ri ring hle tih an hriat hnuah, August 21, 2023 khan party tinte an ngen nawn leh vek niin an sawi.
Mizoram sorkara Law & Judiciary department-in Mizo hnam dan, ‘The Mizo Customary Law’ a tihchhuah, bung 3:74-ah ‘…Mizo hmeichhiain hnam dang pasal a neih chuan hnam dang chhungkuaah a luta ngaih a ni,’ tih a nih thu MZP hruaituten sawiin, “MZP chuan Mizo hmeichhia hnam dang neite chu hnam dang chhungkuaah a ngai nghet tlat a. Mizo mipui aiawha ram rorelna sang bera thu turin a pawm thei lo a ni,” an ti a, political party tinte hnam dang pasal neite candidate-a dah lo tura an ngen nawn thu leh Mizo mipuite pawhin MZP dinna hriaa hetianga hnam dang chhungkuaa lutte an lo candidate a nih pawhin hnawl ngam turin an ngen tih an sawi bawk.
Zawhna chhangin MZP President H Lalthianghlima chuan, “Tun tum MLA inthlanpuiah party-ten hnam dang pasal nei candidate-a an dah a nih chuan kan bawhzui ang a. Thlan tlin an nih loh nan hma lak kan tum,” a ti.