ZPM chuan nimin khan an pisa-ah political session hun hmangin, ‘Nghehna leh Rinawmna’ tih thupui an zir ho.
Thupui thlan bik zirhonaah hian Professor Lalbiakdiki Hnamte, PAC member in zirtirna pein, Mizote’n politic an hmelhriat dan a fuh loh deuh avangin, politics hi a khelhin an khel a, politic chu mi tinreng nghawng a nih avangin thenkhatin ‘politic ka ngaihven lo’ an ti thin chu thil an ngaihtuah chian loh vang niin a sawi.
Prof Lalbiakdiki Hnamte chuan, politics a ngaihtuah ber tur chu ram leh hnam hmasawnna a nih avangin, nghet tak leh rinawm taka ram rawngbawl hi an tih tur a nih thu a sawi a. “Mi mal hmasawnna chauh hian ram hmasawnna a thlen loh avangin, vawiinah pawh hian kan ramin a tuar mek a, mi tam takin vote an thlak peih loh chhan leh politics ka ngaihven lo an tih chhan ber chu, hlawkna an nei ve dawn chuang lo va an hriat vang a ni,” a ti.
Politics hmelhriat dan dik loh avangin mi tlemte hausakna leh hlawkna tura inhnamhnawih hi thil tulah an ngai lo tih sawiin Prof Lalbiakdiki Hnamte chuan, “Chutiang chu kan ram mipui tam takin politics kan hmel hriat dan a nih avangin kan politics hmelhriat dan hi kan thlak a ngai hle a ni,” a ti a. Politic chu mipui rawngbawlna a nih thu leh, mi tinin hma an sawn theihna tur leh ram rawngbawlna felfai nei tura inrelbawlna a nih thu a sawi.
ZPM chu ram hmangaihtute intelkhawm an nih thu leh, thuthlung pakhat vuana nghet taka insuihkhawm an nih mek laia, mahni mi mal hamthatna beiseia an sorkar ve hma hauh a, policy-a rinawm lo va peih loh san ta thenkhat an awm tih a sawi a. Mi mal hlawkna leh hamthatna en lo va, ram mipui ten hma an sawn a, raltiang ram an kai ve theihna tura an policy-a rinawm taka an awm tlat a pawi mawh niin a sawi.