Aizawl: BJP National spokesperson, Mizoram viltu ni bawk, M Kikon-a’n ni thum hnuah MLA inthlan lo awm tura BJP candidate tur puan a nih tur thu a sawi.
Kikon chuan nimin khan Aizawla BJP pisa-ah thuthar thehdarhtute kawmin he thu hi a sawi a. Mizorama MLA inthlan lo awm tura an party candidate tur chungchanga Central Parliamentary Board thu relte chu ni thum hnua an puan theih tur thu a sawi.
BJP national spokesperson chuan Mizorama MLA inthlan lo awm tura an party inbuatsaihnaah BJP Election Management Committee din a nih thu sawiin, BJP Mizoram State President chu Vanlalhmuaka chu Ccairman a ni ang a, Mizoram State Assembly speaker atanga bâng ta, Lalrinliana Sailo chu co-chairman a ni dawn tih a sawi a. Member atan Dr BD Chakma; M Laikaw leh T Zakunga te ruat an nih thu a sawi bawk.
BJP Mizoram Election Manifesto Committee pawh din a nih thu Kikon chuan sawiin, convener atan Dr K Beichhua ruat a nih thu leh member atan Lalrinliana Sailo, Vanupa Zathang, JB Rualchhinga, T Zakunga, R Lalmalsawma leh Nirupam Chakma te ruat an nih thu a sawi.
BJP thupuangtu, Kikon hi Tripura MLA Pramod Reang leh BJP State General Secretary Malsawmtluanga ten an tawiawm a ni.