Brazil lakah huntawp dawnah Eduard Bello chuan overhead kick mawi tak hmangin goal a khung a, an si phurh sutin Venezuela leh Brazil 1-1 in an inhnehtawk.
Zirtawpni zinga Arena Pantanal a 2026 World Cup qualifier inkhelah Venezuela in kum 2015 atanga a zawna match 15 mahni mual a la chak vek Brazil record kallai an titawp a, point khat hlu tak ni thei tur an hlawhchhuak.
Cuiaba a inkhelah hian first half-ah goal a lut lova, second half-ah minute 50-naah defender Gabriel Magalhaes chuan Neymar-a corner pet luh chu ram tana a goal khung hmasa ber ni turin kawh zetin a tauh lut.
Brazil in goal khung belhna huntha an nei nual a, Vinicius Junior chuan minute 71-naah goal khung pawm loh a nei bawk.
Brazil in goal hma a an hriam loh tuarin minute 85-naah Jefferson Savarino ball cross atang Bello-a’n goal mawi a khung.
Brazil coach Fernando Diniz chuan, “Goal thum vel khung belh tur kan ni a, a tawp kan khar chhe thin. Venezuela goal khung kha veng thei kan ni bawk.” tiin a thlirlet.