World champion Argentina in CONMEBOL World Cup qualifying-ah an inkhelh tawhah hnehna an la chang vek a, Zirtawpni zingah Paraguay 1-0 in an hneh.
Buenos Aires-ah Argentina hian Mâs Monumental-ah an mikhualte hi Lionel Messi tel lovin an hmachhawn a. Inter Miami midfielder hi hliam damkawr a nih avangin second half-ah chauh a lut.
Messi awm loh hlana captain Nicolas Otamendi chuan inkhel tan tirah goal a khung nghal a. La Albiceleste in inkhel thunun hneh hle mahse goal erawh an khung belh thei lo.
He inkhelah hian Argentina goalkeeper Emiliano Martinez chuan an ram record a siam a, German Burgos pelin minute 621 aia rei goal a chhuah lo tawh. Martinez laka goal khung hnuhnung ber chu France niin December thla a World Cup final an khelh tum khan a ni.
Argentina hi tunhnaiah an che tha tluang hle a, inkhel an hmachhawn hnuhnung 50 atang vawi khat chauh an tlawm a. An khingpuite laka goal 108 an khung laiin 25 chauh an chhuah.
Inkhel dangah Uruguay in huntawp dawnah Darwin Nunez goal khung hmangin an si phurh an sut a, 2-2 in Colombia nen an inhnehtawk.