Aizawl : Serchhip District Election Officer, Bawrhsap David Lalthantluanga’n nimin khan MLA inthlan lo awm tur chung- changah Serchhip-a thuthar thehdarhtute a kawm a. MLA inthlan lo awm tur atana Serchhip district inbuatsaihna te a sawi.
Candidate nomination file chungchang-ah ECI-in rem a ruat angin October ni 13 (Zirtawpni) atang khan Serchhip dist-a MLA bial pathum – Serchhip, Tuikum leh Hrangturzo biala candidate te nomination file theihna hun chu nitin chhun dar 11 atanga tlai dar 3 thleng hawn a nih thu DEO chuan a sawi a. Nimin tlai dar 3 thleng khan mi 13 in nomination an file tawh thu a sawi.
Candidate zinga nomination file hmasaber chu Hrangturzo biala Independent candidate Zaichhawna Hlawndo a nih thu DEO chuan a sawi a. Candidate dang nomination file tawh te: Serchhip biala INC candidate R. Vanlaltluanga; MNF candidate J. Malsawmzuala Vanchhawng; ZPM candidate Lalduhoma; Independent candidate Lalawmpuia Renthlei; Tuikum biala INC candidate TT. Zothansanga; MNF candidate Er. Lalrinawma; ZPM candidate PC Vanlalruata; Independent candidate C. Lalrinma- wii; Hrangturzo biala BJP candidate Lalmalsawma; INC candidate Lalroenga; MNF candidate Lalremruata Chhangte; ZPM candidate Lalmuanpuia Punte leh Independent candidate Zaichha- wna Hlondo te an nih thu a sawi.
Nomination file theih hun hnuhnung October ni 20, 2023 (Zirtawpni) a nih thu leh inhnuhdawh theih hun hnuhnung October ni 23, 2023 (Thawhtanni) a nih thu a sawi bawk.
Serchhip DEO chuan Election Observer (General, Expenditure leh Police) te ECI-in a ruat kim tawh thu leh Expenditure Obse- rver Umesh Chandrakant Phade-a’n October 13-ah Serchhip a thlen tawh thu a sawi a. General Observer V. Sampath, leh Police Observer Meren Jamir te pawhin nimin tlai lamah khan Serchhip an thlen beisei a nih thu a sawi.
Presiding officer 107, Assistant Presiding Offcer 107 leh Polling Officer 214 appointment order chu generate a nih tawh thu sawiin, training hmasaber October 17, 2023 khan buatsaih a nih thu DEO chuan a sawi a. Training tum hnih buatsaih leh tur a nih thu a sawi.
Candidate te sum hman dan vil tura din Flying Squad, Static Surveillance Team, Video Surveillance Team, Video Viewing Team, MCMC team ten hna an thawh mek thu sawiin, candidate hming pelut tawh te tan Shadow Account Register hawnsak vek a nih thu DEO chuan a sawi a. Kum upa te leh PwD te tan home voting tih theih a nih thu sawiin, Form 12D hmanga dilna hi thehluh tur niin October 18 thleng khan hun hawn a nih thu a sawi.
Heng bakah hian inthlan kaihhnawih mipui hriattur pawimawh hrang hrang te DEO chuan a sawi bawk a ni.